O pleno do Concello de Santiago aprobou este xoves a modificación do plan urbanístico da antiga parcela do Colexio Peleteiro, no Ensanche de Santiago, co voto favorable do Grupo Municipal Socialista.
No pleno celebrado no Pazo de Raxoi, o concelleiro de Urbanismo, Iago Lestegás, reivindicou que o novo proxecto inclúa un 45% de vivenda protexida, a eliminación do uso hoteleiro e un espazo público “de calidade” cara a San Pedro de Mezonzo. “É un día moi positivo para esta cidade”, celebrou o edil.
Na súa quenda de palabra, a concelleira do PSOE Mercedes Rosón, que ratificou o voto favorable do Grupo Socialista, insistiu en que o proxecto que hoxe se levou a Pleno é o mesmo que defendía o PSOE en 2022. “Non todas somos iguais”, manifestou antes de acusar á alcaldesa, Goretti Sanmartín, de “bloquear” esta modificación do Plan cando estaba na oposición e gobernaba o PSOE en Raxoi.
Pola súa banda, o Grupo Popular votou en contra ao considerar que se trata dunha modificación que suporá un “mamotreto” no Ensanche e que, en opinión do portavoz, Borja Verea, será “un bloque de pisos” que “non vai solucionar o problema de vivenda”.
