O concelleiro de Facenda do Concello de Santiago, Manuel César Vila, presentou este martes o proxecto de orzamentos municipais para 2025, que ascende a 146 millóns de euros e se completará cun expediente de modificación de crédito de 1,5 millóns de euros. O edil definiu estas contas como un modelo de “eficiencia social”, cun enfoque prioritario en servizos públicos e atención aos veciños de Compostela.
Durante a presentación, Vila destacou que o proxecto non inclúe subas de impostos, xa que o financiamento ampliarase a través da inspección fiscal e a mellora na xestión tributaria. O responsable de Facenda subliñou que as contas priorizan vivenda, servizos sociais, infraestruturas e transporte urbano, así como a creación dunha cociña centralizada para os comedores escolares, con 1 millón de euros asignado.
No apartado social, o orzamento contempla 6,3 millóns de euros para o Servizo de Axuda no Fogar, ademais de 8,5 millóns para o transporte urbano, mantendo os descontos vixentes. Tamén se inclúben partidas de 4,2 millóns para vivenda, destinadas á compra e rehabilitación de inmobles. Ademais, prevén 12,4 millóns de euros en investimentos, complementados con 1,5 millóns adicionais a través do expediente modificativo de crédito.
Entre as actuacións previstas, Vila mencionou obras como a reforma de Santa Isabel, acondicionamento do Pazo de Raxoi, melloras en Xeneral Pardiñas e o proxecto do barrio verde de Pontepedriña. En materia fiscal, avanzou que se está a traballar na aprobación das ordenanzas para a taxa de residuos e o imposto de estancias turísticas, coa previsión de ingresar 2,6 millóns de euros por este último.
Respecto ao endebedamento, Vila asegurou que a débeda municipal non aumentará en 2025 e que o concello cumprirá as regras fiscais establecidas. O proxecto orzamentario inclúe a creación de sete novas prazas de persoal, entre elas tres para a Policía Local e dous bombeiros.
Finalmente, o edil anunciou que este mércores se reunirá a Comisión Sectorial de Vivenda para avanzar na declaración de Santiago como zona de mercado residencial tensionado, un paso necesario para a aplicación de novas medidas en materia de vivenda.
