A alcaldesa de Santiago, Goretti Sanmartín, mostrou as súas “dúbidas” sobre como se poderá concretar a taxa turística que a Xunta incluíu na lei de acompañamento aos orzamentos para 2025 e criticou que esta proposta de lei salga “dunha emenda do PP á propia lei de acompañamento”.
“Desde o punto de vista das formas, creo que é cuestionable; pero desde o punto de vista dos contidos temos que mirala no Concello a nivel técnico. Recibímola o venres ás 14.00 horas, faremos un estudo e unha análise porque entendemos que esa fórmula se pode corrixir e mellorar”, apuntou a rexedora compostelá en declaracións aos medios na concentración, este domingo, convocada por Queremos Galego.
Así, a alcaldesa lembrou que a Xunta lles trasladou despois da primeira reunión para tratar este asunto que lles ía a dar “o articulado da lei” e “o que apareceu no artigo 8”, sostén Sanmartín, “era unha expresión de vontades” cando, engadiu, trasladóuselles “que ía haber un proceso para poder facer achegas para mellorar esa proposta”.
“O que non é de recibo”, reprochou, “é que se nos convoque con practicamente nada de tempo, tendo que cambiar a axenda para poder asistir e que simplemente se nos diga sen tempo para poder reaccionar. O normal sería que se querían que iso se fixese rápido que na propia lei de acompañamento aparecese o articulado, pero en todo caso, se o querían facer así, que houbese un tempo para falar, porque na primeira reunión insistíronnos en que ía haber un tempo para poder mellorar”, argumentou.
Doutra banda, tamén sinalou que “sorprende” o modelo elixido. “No canto de ir a un imposto de estancias turísticas, vaise a unha recarga municipal; nesa recarga municipal hai algúns condicionantes que entendemos que non se deben de pór se esa é a fórmula, entón isto é sen tempo ningún para reaccionar”, lamentou.
