O concelleiro do Partido Popular de Santiago, José Antonio Constenla, denunciou hoxe en rolda de prensa a recente substitución de luminarias no Campus Sur, especialmente na Avenida de Antonio Raimundo Ibáñez, levada a cabo a pesar dun ditame desfavorable emitido pola Comisión de Patrimonio. Segundo Constenla, a actuación vulnera o “Plan Especial de Protección e Rehabilitación da Cidade Histórica de Santiago”, aprobado en 2015, que establece normas estritas sobre o mantemento e conservación de elementos históricos na zona.
Constenla cuestionou o motivo polo que o BNG ignorou o ditame unánime e desfavorable da Comisión, substituíndo 130 puntos de luz sobre columnas, e criticou o feito de que os nacionalistas “urxisen o cambio sen xustificación”. O edil afirmou que “debería ser o BNG o primeiro en cumprir coas ordenanzas e non pedirlle á veciñanza que faga o que eles mesmos non fan”.
Ademais, sinalou a falta de información clara sobre a catalogación das luminarias retiradas, un aspecto que o concelleiro de Obras do BNG afirmou descoñecer por completo. Constenla considera esta falta de claridade inaceptable despois de máis dun ano de xestión sobre o tema.
O concelleiro popular destacou tamén a preocupación do seu grupo pola “actitude permisiva” do BNG ante cambios que poderían alterar a imaxe histórica e protexida da contorna do casco vello de Santiago. “Non sabemos se esta intervención é permanente ou provisional, nin quen asumirá os custos dunha posible reposición”, afirmou, demandando que calquera cambio neste ámbito se acompañe dun proxecto de intervención que respecte o patrimonio.
Finalmente, Constenla insistiu en que “o BNG levou a cabo unha actuación que alterará notablemente a imaxe do ámbito histórico e que, segundo a Comisión de Patrimonio, debe respectar os valores culturais da zona”.
