A portavoz municipal de Santiago de Compostela, Míriam Louzao, avanzou este luns que o Goberno local consultará xuridicamente se a taxa turística presentada pola Xunta na lei de acompañamento dos orzamentos é “xuridicamente válida”. En rolda de prensa tras a xunta de goberno, Louzao lamentou a “falta de palabra co prometido” pola administración autonómica. “Díxose que esa lei estaba xa desenvolvida na lei de acompañamento, pero non está. Hai un novo compromiso, que nos parece vago e impreciso, e niso estamos a traballar desde o departamento para confirmar se tal e como aparece recolleito é xuridicamente válido”, manifestou.
A partir de aí, relatou, cando teñan a proposta final de lei, coas emendas, comezarán a traballar desde o Concello, pero, engadiu, “sen ter o texto final é un pouco máis complicado empezar a traballar”. Con todo, apuntou que é “unha boa noticia” que se poida pór en marcha esta medida e asegurou que detrás da capital galega “virán máis concellos”, polo que insistiu en que “o lóxico” é que sexa a Axencia Tributaria de Galicia (Atriga) quen o recade porque, na súa opinión, iso axudaría a que outros municipios queiran pór en marcha este imposto.
