A Fundación CRIS contra el cáncer, en colaboración coa Fundación Iñaki Nogueroles, lanzou ‘El Sello de Quique‘, un proxecto de recadación de fondos destinado á investigación en terapias avanzadas para o cancro infantil. O protagonista desta iniciativa é Quique, un adolescente de 14 anos diagnosticado cun sarcoma alveolar, quen percorrerá o Camiño de Santiago para apoiar a investigación contra esta enfermidade.
Quique, acompañado por uns 50 familiares e amigos, comezará a súa peregrinación desde Sarria o 6 de agosto, despois de ser recibido polo alcalde Claudio Garrido nun acto oficial o día anterior. A comitiva percorrerá 115 quilómetros ata chegar a Santiago de Compostela o 11 de agosto, coa meta de recadar 100.000 euros para o novo ensaio CAR4SAR, desenvolvido na Unidade CRIS de Terapias Avanzadas en Cancro Infantil do Hospital La Paz de Madrid.
Rocío Nogueroles Monrabal, presidenta da Fundación Iñaki Nogueroles e tía de Quique, resaltou a importancia de aumentar a conciencia sobre a necesidade de investigar para lograr un futuro sen sarcomas: “Ademais de alcanzar o noso obxectivo de recadación, queremos que a sociedade tome conciencia da urxencia de continuar investigando”. O conselleiro de Sanidade, Antonio Gómez Caamaño, recibirá ao grupo na Praza do Obradoiro, mostrando o apoio institucional a esta causa.
A directora da Fundación CRIS contra el cáncer, Marta Cardona, destacou a valentía de Quique e a súa familia, sinalando que a investigación é clave para a supervivencia dos pacientes: “A investigación é supervivencia para os pacientes. Sociedade civil e institucións debemos traballar xuntas para dotar de recursos necesarios á ciencia”.
O doutor Antonio Pérez Martínez, director da Unidade CRIS de Terapias Avanzadas en Cáncer Infantil, agradeceu o apoio ao ensaio clínico CAR4SAR: “É un ensaio clínico no que modificamos linfocitos T dun doante para facelos máis potentes e capaces de recoñecer e eliminar as células de sarcoma do paciente”.
A Fundación CRIS contra el cáncer, con sedes en España, Reino Unido e Francia, financia proxectos en 80 centros de investigación e hospitais de 16 países. Desde a súa creación, ten investido 50 millóns de euros en investigación grazas ás doazóns de particulares e empresas.
O proxecto de Quique, ‘El Sello de Quique‘, busca non só recadar fondos, senón tamén inspirar a outros pacientes a loitar e superar a enfermidade, visibilizando os retos únicos que enfrontan os mozos con cancro e promovendo unha vida plena baseada na autoestima, a alimentación saudable e o exercicio físico.
