O programa Roteiros Saudables da Asociación Española contra o Cancro (AECC) regresará a Santiago de Compostela o próximo 14 de outubro cunha nova edición de andainas destinadas a fomentar a actividade física e reducir os hábitos sedentarios. Os percorridos celebraranse cada quince días, os mércores ás 11:00, e permitirán coñecer diferentes espazos da cidade mediante camiñadas de arredor de cinco quilómetros.
A concelleira de Dereitos e Servizos Sociais, Promoción Económica e Xuventude, María Rozas, presentou este martes a iniciativa xunto ao presidente da xunta local de Santiago da AECC, Xoán Concheiro, e Andrea Gómez, psicóloga e integrante da área de promoción da saúde da entidade. Rozas destacou que o programa se converteu nunha actividade habitual da colaboración entre o Concello e a asociación e incidiu na súa dobre vertente de promoción da saúde e creación de espazos de encontro.
As rutas terán unha duración aproximada de entre 60 e 90 minutos e estarán deseñadas para resultar accesibles a persoas con diferentes condicións físicas. A proposta está aberta tanto a pacientes oncolóxicos e familiares como ao conxunto da cidadanía. “A idea é promover a saúde física”, explicou Rozas, que tamén salientou a dimensión social das saídas, ao facilitar o contacto entre participantes e o intercambio de experiencias.
A concelleira relacionou a iniciativa co incremento do sedentarismo asociado aos actuais estilos de vida e ao uso das novas tecnoloxías. Lembrou que as recomendacións sanitarias sitúan en 150 minutos semanais a actividade física que debería realizar unha persoa adulta e apuntou que unha parte importante da poboación non alcanza esa referencia. Rozas citou tamén datos dun estudo da Universidade de Santiago segundo os cales aumentou na última década a porcentaxe de persoas que pasan máis de catro horas e media sentadas ao día, mentres que un 36% da poboación galega presenta un gasto enerxético baixo nas súas actividades de lecer.
PERCORRIDOS POR PARQUES E BARRIOS DE SANTIAGO
O calendario permitirá percorrer diferentes puntos do municipio. Entre os itinerarios previstos figuran traxectos entre o Multiusos Fontes do Sar e o parque Eugenio Granell, entre Carlo Magno e San Lázaro, ou desde Eugenio Granell ata o Banquete de Conxo. Tamén se contemplan rutas por Fonseca e a carballeira de San Lourenzo, Santa Isabel, Vistalegre, a Granxa do Xesto, Belvís, A Almáciga e Ponte Mantible.
Concheiro explicou que a intención é combinar o exercicio cunha aproximación a espazos que, malia formar parte da contorna habitual dos composteláns, poden ser descoñecidos para parte dos participantes. “Cada paso conta”, resumiu o presidente da xunta local da AECC, quen incidiu en que o obxectivo non pasa por realizar grandes distancias, senón por incorporar o movemento ás rutinas cotiás e conseguir que o hábito se manteña no tempo.
A organización prevé grupos reducidos para facilitar o desenvolvemento das saídas. Andrea Gómez explicou que se establece como referencia un máximo de entre 15 e 20 persoas, xa que as andainas dependen do traballo do voluntariado e é preciso garantir a seguridade e o acompañamento dos participantes. A finais da semana pasada había xa arredor de dez ou once persoas inscritas.
As inscricións permanecerán abertas ao longo de todo o ano e poderán realizarse contactando coa AECC ou acudindo á súa sede. As persoas participantes incorporaranse tamén a unha canle de comunicación coa organización para recibir información sobre os percorridos e posibles modificacións. En caso de condicións meteorolóxicas que impidan realizar unha saída, a actividade trasladarase ao seguinte mércores.
Concheiro enmarcou os roteiros dentro do traballo preventivo da asociación, xunto coa atención gratuíta a pacientes e familiares e o financiamento da investigación oncolóxica. Segundo explicou, unha parte relevante dos casos de cancro está relacionada con factores de risco modificables, polo que a AECC busca promover hábitos vinculados ao exercicio, á alimentación e á redución do sedentarismo. A iniciativa compostelá súmase ademais á colaboración da entidade co Clúster Galego da Industria do Deporte dentro do ‘Plan 2.000.000’.
UNHA NOITE SOLIDARIA O 23 DE OUTUBRO
Durante a presentación, Concello e AECC aproveitaron tamén para avanzar a próxima Noite Solidaria contra o Cancro, prevista para o 23 de outubro. O encontro terá como finalidade recadar fondos para apoiar os programas de atención a pacientes e familias, as campañas de prevención e a investigación, pero a entidade pretende tamén convertelo nun punto de encontro para a sociedade compostelá.
A cita contará cunha proposta gastronómica centrada en produtos galegos con certificación de calidade diferenciada, entre eles alimentos amparados por denominacións de orixe, indicacións xeográficas protexidas, produción ecolóxica e artesanía alimentaria. Segundo avanzou Concheiro, participarán profesionais da cociña e a velada incluirá tamén actuacións artísticas que a organización dará a coñecer máis adiante.
