O secretario de Estado de Memoria Democrática, Fernando Martínez, e a reitora da Universidade de Santiago de Compostela (USC), Rosa Crujeiras, asinaron este sábado o acordo de colaboración para pór en marcha a nova Cátedra de Memoria Democrática. Para o desenvolvemento das súas actividades, o Ministerio de Política Territorial e Memoria Democrática achegará un financiamento anual de 50.000 euros.

En concreto, a dirección da cátedra estará a cargo do historiador Emilio Grandío Seoane, especialista no estudo da Guerra Civil española, a represión franquista e as políticas de memoria. Ao acto de firma, celebrado en San Xerome, asistiron tamén o delegado do Goberno en Galicia, Pedro Branco; a subdelegada do Goberno na Coruña, Obdulia Taboadela; e a vicerreitora de Cultura, Lingua e Patrimonio da USC, Ana Cabana.

Esta iniciativa está destinada a promover a investigación, a docencia, a transferencia de coñecemento e a divulgación dos valores democráticos entre a cidadanía e o estudiantado. Entre as accións previstas destacan a organización de xornadas, seminarios, conferencias e congresos, a elaboración de publicacións científicas e divulgativas, e a produción de documentación e materiais audiovisuais.