Traballadores de Lacera, a empresa concesionaria de conserxería e limpeza nos colexios de Santiago, volverá á folga este mes de setembro para reclamar a mellora das súas condicións laborais, unha situación que xa os levou a paros a finais do curso pasado e que, denuncian, continúa sen solucionarse.
Así o anunciou o representante da CIG Paulo Rubido, nunha rolda de prensa na que volveu a explicar que este é “clarísimamente o contrato máis precario” de Santiago de Compostela e que se desenvolve en “situación anómala”. A pesar do incremento orzamentario do concello para este contrato, que “case triplicou a dotación”, as condicións que aplica a empresa “seguen sendo as mesmas”, denuncia. “Cando se realizou a adxudicación atopámonos cunha empresa que se negou a negociar connosco, alegou que a oferta non chegaba para cubrir esa demanda de mellora”, explicou Paulo Rubido.
Os traballadores realizaron tres xornadas de folga no mes de xuño e durante o verán abriuse “un proceso de negociación” no que a empresa “se comprometeu de forma tácita a aplicar melloras no horario”. “Finalmente, estes días está a informar ás traballadoras de que non vai aplicar este acordo e que non quere negociar o resto de condicións de mellora do convenio colectivo”, denunciou Rubido.
Para o representante da CIG, esta situación “evidencia que desde o concello non se fixo algo ben, incrementouse a dotación pero iso non supuxo a día de hoxe ningún punto de mellora nas condicións laborais das traballadoras”, como o feito de que o novo horario para este curso é de 39 horas fronte ás 37,5 do resto de contratos de limpeza municipais. As traballadoras, apuntou o sindicalista, están “cansadas desta situación” e decidiron acudir de novo á folga con 10 xornadas que terán lugar entre o 14 e o 18 de setembro e entre o 21 e o 25 de setembro. “Se non somos capaces de chegar a acordo, atoparémonos cunha situación de conflito nos colexios de Compostela”, advertiu Paulo Rubido.
