A asociación Arelas anunciou a convocatoria dunha concentración en Santiago de Compostela con motivo do Día Internacional da Visibilidade Non Binaria, unha mobilización que se celebrará o sábado 11 de xullo, ás 12:30, fronte ao Concello, na Praza do Obradoiro.
A entidade sairá á rúa baixo o lema “A liberdade non cabe no binarismo”, co obxectivo de reivindicar a existencia, a dignidade e os dereitos das persoas non binarias. A convocatoria busca facer visible unha realidade que, segundo traslada Arelas, precisa de máis respecto, espazo e recoñecemento social.
Desde a asociación sinalan que as identidades non binarias “non son un debate: son unha realidade que merece respecto, espazo e recoñecemento”. Con esta mensaxe, a concentración pretende reclamar unha maior presenza pública das persoas que non se identifican exclusivamente dentro das categorías binarias de home ou muller, así como avanzar na defensa dos seus dereitos.
A mobilización terá lugar nun espazo central da capital galega, fronte ao Pazo de Raxoi, sede do Concello de Santiago, e insírese no calendario de actividades arredor da diversidade afectivo-sexual e de xénero que se desenvolven durante estas semanas.
Tras a concentración, a xornada continuará cun xantar colectivo no Parque de Galeras, concibido como un espazo de encontro e convivencia. Arelas tamén prevé a realización de diferentes actividades e obradoiros ao longo do día.
Entre as propostas programadas figura a presentación da nova guía de linguaxe non binaria elaborada por Nee Barros e Alva Lourenço, así como un taller de regueifa e drag a cargo de O Rabelo e Meiga-i.
