O Concello de Santiago amosou este venres o seu apoio ao labor que desenvolve a Asociación Compostelá de Esclerose Múltiple, Parkinson, ELA e outras enfermidades neurodexenerativas (ACEM) durante a visita institucional á carpa informativa instalada na Praza de Cervantes con motivo do Día Mundial da Esclerose Múltiple, que se conmemora este sábado 30 de maio.
Na visita participaron a alcaldesa, Goretti Sanmartín, e a tenente de alcaldesa, María Rozas, quen puxeron en valor o traballo que realiza a entidade tanto no acompañamento das persoas afectadas como no apoio ás súas familias e contornas máis próximas.
Rozas destacou a colaboración existente entre o Concello e ACEM e subliñou a amplitude dos servizos que ofrece a asociación. A tenente de alcaldesa sinalou que a entidade desenvolve un labor que vai máis alá da atención sanitaria, abordando cuestións relacionadas coa orientación laboral, a inclusión social e o acceso ao lecer das persoas con esclerose múltiple, párkinson, ELA e outras doenzas neurodexenerativas.
A responsable municipal tamén animou á cidadanía a achegarse á mesa informativa instalada no centro histórico compostelán para coñecer de preto o traballo da asociación e participar nas actividades organizadas con motivo desta xornada de sensibilización.
Pola súa banda, a alcaldesa incidiu na necesidade de dar visibilidade a enfermidades que, en moitas ocasións, permanecen afastadas da realidade cotiá dunha parte da sociedade. Sanmartín afirmou que accións como esta contribúen a aumentar o coñecemento social sobre a esclerose múltiple e outras patoloxías neurodexenerativas, ao tempo que permiten dar a coñecer os recursos existentes para as persoas afectadas.
A rexedora compostelá puxo o foco no papel que desempeñan as asociacións de pacientes, ás que definiu como unha rede de apoio fundamental para quen convive coa enfermidade. Segundo explicou, estas entidades proporcionan acompañamento, información e orientación tanto ás persoas diagnosticadas como ás súas familias e amizades, que tamén afrontan as consecuencias destas doenzas.
Sanmartín destacou que o movemento asociativo adoita identificar e trasladar ás administracións as necesidades existentes, contribuíndo a orientar as políticas públicas e os recursos destinados á atención destas enfermidades. Neste sentido, expresou o respaldo do Concello ao traballo que realizan as asociacións e agradeceu o compromiso das persoas que participan nelas.
Durante a visita, as representantes municipais tamén fixeron un chamamento á veciñanza para que se achegue á Praza de Cervantes e participe nas actividades informativas programadas. A alcaldesa sinalou que a iniciativa está a rexistrar unha boa resposta cidadá e valorou positivamente a implicación da poboación compostelá nas accións de sensibilización impulsadas por ACEM.
