Santiago de Compostela conta dende este mércores cun novo movemento cidadán centrado na defensa da accesibilidade universal. Trátase da ‘Plataforma Compostela, Accesible, XA!’, unha iniciativa que pretende visibilizar e combater as dificultades ás que se enfrontan a diario persoas con discapacidade, mobilidade reducida, maiores ou familias con carriños de bebés no municipio.

A proposta xorde co obxectivo de situar a accesibilidade como un eixo prioritario na planificación urbana e social da cidade. Segundo trasladan dende o colectivo, Santiago debe avanzar cara a un modelo máis inclusivo, adaptado ás necesidades da súa veciñanza e tamén á realidade dun destino internacional que recibe milleiros de visitantes cada ano.

A iniciativa está promovida por Diego Adrián Mallo, líder do partido UCIN Santiago, quen é actualmente usuario de cadeira de rodas debido a unha lesión. A súa experiencia persoal constitúe, segundo indican, un dos puntos de partida para impulsar esta plataforma e trasladar á esfera pública as limitacións existentes no día a día, algunhas das cales xa trasladara aos medios de comunicación durante a Semana Santa.

Entre as principais demandas do colectivo atópanse a eliminación de barreiras arquitectónicas en rúas, prazas e edificios públicos, así como a mellora dos itinerarios accesibles tanto no casco histórico como nos barrios. Tamén reclaman un incremento das prazas reservadas e un maior control do seu uso, ademais dun transporte público adaptado e eficaz.

A plataforma inclúe igualmente entre os seus obxectivos a creación de espazos culturais, festivos e deportivos accesibles, así como o impulso da participación real das persoas con discapacidade nos procesos de decisión municipal. A sensibilización social sobre a importancia da accesibilidade universal é outro dos eixes de traballo que pretenden desenvolver.

Dende o colectivo fan un chamamento aberto á cidadanía, ás asociacións e ás institucións para colaborar neste proxecto e avanzar nun modelo de cidade máis accesible. Neste sentido, sinalan que “a accesibilidade non beneficia só a uns poucos: beneficia a toda a sociedade”.

Nos vindeiros días, a plataforma prevé poñer en marcha accións públicas, campañas informativas e encontros veciñais, co fin de recoller propostas e trasladar demandas concretas ás administracións competentes.