As principais organizacións do terceiro sector en Galicia reuníronse este martes na Praza da Quintana de Santiago de Compostela para impulsar a campaña da ‘X Solidaria’, a un día do inicio da declaración da renda, que comeza este mércores 8 de abril.
O acto desenvolveuse desde as 11:00 baixo o lema ‘Ou Xesto Lendario’, no que as entidades participantes despregaron unha gran “X” de tea co obxectivo de chamar á cidadanía a marcar a casa 106, destinada a fins sociais. A iniciativa contou coa presenza de representantes de distintas federacións e redes que traballan contra a pobreza e a exclusión social en Galicia.
Segundo explicou a directora da Plataforma de Organizacións de Infancia de Galicia, Inés Salteiro, a marcación desta casa permite financiar programas de intervención social en todo o territorio. “No 2025 conseguimos que 783.189 persoas, un 53,2% dos contribuíntes galegos e galegas, marcasen a casa da ‘X Solidaria’. Un número similar de persoas pero cunha maior recadación: 30.127.138 euros, 3.607.069 euros máis que o ano anterior”, sinalou.
A través desta vía, un total de 168 organizacións galegas desenvolveron 773 proxectos sociais, que chegaron directamente a 184.388 persoas beneficiarias.
Con todo, desde as entidades advertiron de que aínda existe marxe de mellora. Salteiro indicou que 698.443 contribuíntes galegos non marcan esta opción, o que suporía incrementar a recadación en case 20 millóns de euros adicionais. Neste sentido, lembrou que esta decisión “non custa nada, nin pagas máis, nin che devolverán menos”.
A responsable tamén puxo o foco na situación social actual, destacando que en Galicia preto de 600.000 persoas están en risco de pobreza ou exclusión social, unha cifra que ascende a 12,6 millóns no conxunto do Estado.
Pola súa banda, o presidente de CERMI Galicia, Ramón Sestayo, fixo un chamamento á participación cidadá nun contexto internacional que cualificou de “pouco esperanzador”. “Decidir o que queremos que se faga cos nosos impostos é un dereito que non todo o mundo coñece e por conseguinte, non o aplica. O noso obxectivo é que a xente marque a casa e decida o destino do investimento do seu diñeiro”, afirmou.
No acto tamén participou a directiva de EAPN Galicia-Rede Europea contra a Pobreza, Saray Durán.
A mobilización desenvolveuse de maneira paralela na cidade de Vigo, diante do MARCO, onde entidades sociais e persoas beneficiarias reiteraron a importancia de manter e ampliar o financiamento procedente do 0,7% do IRPF, clave para o desenvolvemento de programas sociais en Galicia.
