O Teatro Principal de Santiago será escenario este xoves ás 19:00 da proxección do documental Adeus vista dos meus ollos, unha iniciativa impulsada pola Oficina de Atención á Migración (OAM) e pola Unidade Municipal de Atención a Persoas Migrantes co obxectivo de visibilizar as experiencias da mocidade migrante e contrarrestar os discursos de odio.
A concelleira María Rozas presentou a actividade acompañada pola autora do documental, Marisa Moredo, e pola educadora social Paula Aller, responsable do programa municipal de mediación escolar intercultural. Segundo explicou Rozas, a proposta pretende “mostrar a realidade” fronte á “distorsión que se produce a diario a través das redes sociais”, especialmente entre a xente nova.
A proxección será de entrada libre ata completar aforo e irá seguida dun coloquio cos protagonistas do filme, no que se abordará a realidade da mocidade migrante en primeira persoa.
UN RELATO DENDE AS AULAS
O documental, realizado por Marisa Moredo, naceu no ámbito educativo e conta coa participación de 21 mozos e mozas que relatan o seu proceso de adaptación ao sistema educativo galego. A autora sinalou que o proxecto xorde da necesidade de “dar voz a estas persoas que moitas veces están silenciadas dentro do proceso migratorio”.
Moredo subliñou que “a mellor forma de contrarrestar o discurso de odio é con outro discurso, en primeira persoa, dendea emoción e dende o corazón”. Ao longo das distintas proxeccións realizadas en institutos, explicou, o impacto máis significativo foi a reacción do alumnado, que recoñeceu actitudes e comentarios realizados “dende a ignorancia, dende o non saber como se sente o outro”.
Na sesión compostelá participarán algúns dos protagonistas, acompañados das súas familias. A directora destacou tamén a colaboración do grupo musical Zabala, que interpretará temas do seu novo traballo, entre eles a canción que pecha o documental.
DATOS QUE ALERTAN DA SITUACIÓN
Durante a rolda de prensa, María Rozas fixo referencia a informes recentes do Observatorio de Racismo e Xenofobia e do Ministerio do Interior que apuntan á presenza de insultos racistas en contornos dixitais e a un aumento dos delitos de odio, unha parte significativa deles vinculados ao racismo ou á xenofobia. A edil indicou que se trata de cifras que poden estar infrarepresentadas, xa que este tipo de delitos non sempre se denuncian.
Neste contexto, defendeu que as administracións públicas deben “poñer o seu gran de area” para frear esta tendencia e reforzar a convivencia.
MEDIACIÓN INTERCULTURAL NAS AULAS
A comparecencia serviu tamén para facer balance do programa piloto ‘Convivimos con respecto: mediación escolar intercultural’, desenvolvido pola Unidade de Atención a Persoas Migrantes en seis centros educativos de Santiago: CEIP de Roxos, CEIP de Vite, Lamas de Abade, Mestre Rodríguez Xixirei, Os Remedios e un centro concertado da cidade.
A iniciativa, dirixida a alumnado de sexto de primaria, contou coa participación de máis de 250 estudantes. Segundo explicou Paula Aller, o proxecto estruturouse en distintos bloques de traballo que abordaron cuestións como o fenómeno migratorio, a análise de mitos e prexuízos, a relación entre desinformación e conflito e a mediación como ferramenta de resolución dialogada.
A metodoloxía foi participativa e vivencial, con dinámicas de grupo e simulacións de conflitos reais. Aller definiu a figura do mediador como “aquel axente que de maneira neutral facilita o encontro de dúas posturas diferentes para chegar a unha solución”.
Dende o Goberno local sinalaron que a acollida foi positiva e que os propios centros trasladaron a vontade de dar continuidade á experiencia. Rozas concluíu que a escola é “un espazo para aprender a dialogar, a cooperar e a resolver conflitos” e que o traballo nas aulas resulta clave para construír unha cidade diversa e inclusiva.
