O Partido Popular de Santiago denunciou este martes a vandalización da súa sede local, que amenceu empapelada con propaganda vinculada a grupos que cualifica de “radicais independentistas”. A formación considera o sucedido un acto “intolerable” e contrario ás normas básicas da convivencia democrática.
Dende o grupo municipal popular sinalan que non se trata dun feito illado, lembrando que no mes de novembro, coincidindo coa conmemoración do 25N, a sede xa fora obxecto doutro episodio de vandalización, no que tamén se produciu un escrache. Segundo indican, naquela ocasión varias integrantes da formación sufriron agresións verbais.
En relación con estes feitos, o PP de Santiago cualifica a situación como unha “escalada preocupante de sinalamentos e ataques” e critica a falta de posicionamento público da alcaldesa, Goretti Sanmartín. Segundo trasladan desde a formación, consideran que non houbo unha defensa clara das persoas afectadas por estes episodios.
A organización subliña que a discrepancia política debe expresarse desde o respecto e a palabra, e nunca mediante actos de vandalismo, acoso ou intimidación. Ao seu xuízo, os ataques reiterados ás súas instalacións e ás persoas vinculadas ao partido supoñen unha ameaza para a convivencia democrática na cidade.
Así mesmo, o PP de Santiago lamenta que determinados colectivos recorran a este tipo de prácticas, que —ademais de provocar danos materiais—, segundo sosteñen, contribúen a xerar un clima de tensión e confrontación en Santiago de Compostela.
Asimesmo, a formación popular esixe que se poña fin a estes comportamentos incívicos, reclama que se depuren responsabilidades e reitera o seu compromiso cunha política baseada no diálogo, a liberdade de expresión e o respecto ás regras democráticas, facendo un chamamento á convivencia e ao respecto mutuo.
