As protestas polo desaloxo do centro social ‘Escarnio e Maldizer’, situado na rúa Algalia de Arriba, continuaron este venres pola tarde no centro histórico de Santiago. A mobilización comezou ás 20:00 cunha concentración inicial na Praza de Cervantes, dende onde partiu unha manifestación que percorreu distintas rúas e prazas da zona vella e do Ensanche.
Dende a Praza de Cervantes, a marcha desprazouse até a Praza da Quintana para continuar pola rúa do Vilar, pasando fronte á Sala Yago, que fora tamén okupada no pasado, e dirixirse posteriormente cara a Porta Faxeira. Nese punto, o grupo, que nesta ocasión superaba o centenar de persoas, entrou na calzada, o que obrigou á Policía Nacional a realizar cortes improvisados do tráfico ao paso da manifestación.
O percorrido continuou polas rúas da Senra, Fonte de San Antonio, Ensinanza e Virxe da Cerca, antes de subir novamente por Casas Reais até o cruzamento entre esta vía e Algalia de Arriba, lugar no que se atopa o inmoble desafiuzado.
Neste tramo produciuse un dos momentos máis tensos da mobilización, coincidindo coa presenza de efectivos antidisturbios.
Durante o traxecto, un colector de lixo foi queimado na Praza de Salvador Parga, o que motivou a intervención dun equipo de bombeiros para sufocar o lume. Ao longo de toda a concentración rexistrouse tamén o lanzamento de petardos e bengalas de fume.
Tras a situación de maior tensión no cruzamento de Casas Reais con Algalia de Arriba, as persoas participantes deron marcha atrás e regresaron cara á Praza de Cervantes. Nos últimos minutos do percorrido escoitáronse consignas como “Vergoña me daría ser policía”, mentres continuaban os petardos, algúns deles lanzados contra os efectivos policiais.
A manifestación deuse por rematada ás 22:15, sen que se producisen incidentes de consideración, altercados nin cargas policiais, malia os momentos de maior tensión vividos no tramo final da protesta.
