Unha vintena de profesionais médicos do servizo de Urxencias do Complexo Hospitalario Universitario de Santiago (CHUS) realizou este luns unha concentración ás portas das instalacións para denunciar o colapso asistencial que, segundo indican, se vén repetindo de maneira continuada e para esixir ao Servizo Galego de Saúde (Sergas) a revisión das súas condicións laborais.
A mobilización deu comezo arredor das 12:00 e serviu para poñer o foco no papel esencial das Urxencias dentro do sistema sanitario. Durante a protesta, unha das facultativas participantes subliñou que se trata dun servizo que mantén a súa actividade de maneira permanente: “Somos os que sempre estamos”.
Os profesionais alertaron de que a situación de saturación, tradicionalmente asociada aos meses de inverno, pasou a ser case crónica, xa que tamén se rexistran episodios de forte presión asistencial durante o verán. Segundo explicaron, esta realidade responde a múltiples factores, entre eles a falta de capacidade dos hospitais para absorber o volume de pacientes, o que impide axilizar o chamado circuíto de saída e liberar espazos en Urxencias.
Entre as principais reivindicacións figura a demanda de que a Consellería de Sanidade abra un proceso de negociación para actualizar o acordo específico de Urxencias e adaptalo ás actuais dinámicas de traballo. Os médicos sinalan a necesidade de ter en conta a ampliación de persoal, o incremento das entradas de pacientes e unha mellora das condicións retributivas da categoría. Segundo indicaron, en xaneiro de 2024 o departamento autonómico comprometeuse a manter unha reunión para abordar estas cuestións, un encontro que, segundo denuncian, “aínda non se produciu”.
Durante a concentración tamén interveu Manuel González Moreira, membro da Executiva de CIG-Saúde, quen incidiu en que os problemas do sistema sanitario non se circunscriben á Atención Primaria. Ademais do habitual incremento de pacientes con patoloxías respiratorias nesta época do ano, apuntou a unha demanda oncolóxica en aumento e á atención de enfermos considerados fráxiles.
“O que estamos a ver agora son estes tres picos de influencia e o sistema non está ben dimensionado para atender este tipo de novas patoloxías”, sinalou González Moreira, que definiu a situación como consecuencia dun problema de carácter estrutural que afecta ao conxunto do sistema sanitario público.
O representante sindical rexeitou tamén as recentes declaracións do conselleiro de Sanidade, Antonio Gómez Caamaño, quen asegurara que a situación nas Urxencias estaba “controlada” e que a presión asistencial se atopaba “a diminuír”. Segundo González Moreira, estas afirmacións asumen como normal que haxa corredores cheos de pacientes e esperas de 24, 48 ou mesmo 72 horas en Urxencias á espera dunha cama hospitalaria.
Dende o colectivo insisten en que a principal demanda pasa por axustar os cadros de persoal ás novas necesidades asistenciais. “Isto é o que non escoita a Consellería”, concluíu o representante da CIG-Saúde.
