O servizo de urxencias do Complexo Hospitalario Universitario de Santiago volveu vivir na tarde deste domingo unha situación de saturación asistencial, segundo denunciou a Asociación de Pacientes e Usuarios do CHUS nun comunicado remitido aos medios. A entidade asegura que, ás 18:51, había 30 pacientes cualificados como graves agardando nos corredores de acceso ás urxencias, en cadeiras de rodas e padiolas, á espera de poder ser trasladados ás áreas de atención, ocupadas por persoas con ingreso xa asignado en planta.
Segundo os mesmos datos, apenas vinte minutos despois, ás 19:10, o número de pacientes graves nos corredores elevárase ata 38, mentres que 43 persoas permanecían pendentes de ingreso hospitalario. A asociación subliña que estas situacións se producen durante horas e afectan directamente ás condicións de atención, dignidade e intimidade das persoas doentes.
A entidade apoia a súa denuncia en cifras oficiais publicadas polo Servizo Galego de Saúde no denominado “pulso do CHUS”. De acordo con eses datos, nas últimas 24 horas foran atendidas 397 persoas en urxencias, unha cifra inferior á rexistrada o 9 de xaneiro, cando se atenderan 446 pacientes e se denunciara tamén un colapso con máis de corenta persoas nos corredores. En canto á capacidade hospitalaria, o número de camas ocupadas situábase en 874, mentres que 637 camas permanecían dispoñibles pero sen habilitar, segundo a asociación, por non contar con persoal sanitario asignado.
Desde o colectivo de pacientes considérase que non se trata dun episodio puntual nin vinculado a picos estacionais, senón dunha situación “grave e persistente” que responde a causas estruturais coñecidas polos responsables sanitarios. Neste sentido, a asociación identifica tres factores principais que explican a saturación recorrente das urxencias compostelás.
En primeiro lugar, sinalan unha dotación insuficiente de persoal sanitario, especialmente no ámbito da medicina interna e da enfermaría. Segundo trasladan, serían necesarias 15 prazas adicionais de internistas para poder atender en condicións axeitadas aos pacientes ingresados e permitir así a rotación de camas demandadas desde urxencias.
Como segundo elemento, apuntan á debilidade da atención primaria como porta de entrada ao sistema sanitario. A asociación denuncia que se están a xeneralizar demoras de entre 10 e 20 días para unha consulta presencial por unha doenza nova, unha circunstancia que, ao seu xuízo, empurra a moitas persoas a acudir directamente ás urxencias hospitalarias cando o seu estado de saúde empeora.
O terceiro factor mencionado é a escaseza de ambulancias dispoñibles para o traslado de pacientes con alta asinada. Segundo a denuncia, moitas persoas permanecen durante horas ocupando camas hospitalarias que xa non precisan, á espera de transporte sanitario. A asociación asegura que o CHUS conta unicamente con dúas ambulancias, que en numerosas ocasións funcionan cun só condutor.
A Asociación de Pacientes e Usuarios do CHUS insiste en que estas situacións supoñen unha vulneración continuada dos dereitos fundamentais das persoas doentes, especialmente no que atinxe á dignidade e á intimidade, e considera que non son compatibles cun estado de dereito. Ademais, advirten de que este escenario está a deteriorar a confianza no sistema público de saúde e a provocar unha quebra do principio de equidade no acceso á atención sanitaria.
Por todo isto, o colectivo volve reclamar a adopción de medidas inmediatas e efectivas que poñan fin ao que cualifican como “maltrato asistencial” e permitan garantir unha atención digna ás persoas que acoden ás urxencias do hospital compostelán.
