A concelleira do Grupo Municipal Socialista de Santiago, Marta Abal, denunciou o estado de conservación de dous parques infantís da cidade, situados na Praza Marcial Villamor Varela e detrás do Local Social da Gracia, que, segundo sinalou, presentan deficiencias que afectan á seguridade das persoas usuarias máis novas.
Segundo explicou a edil, no parque da Praza Marcial Villamor Varela o pavimento de caucho atópase deteriorado e varios elementos de xogo están danados, unha situación que, ao seu xuízo, supón un risco para os nenos e nenas que fan uso diario destas instalacións. No caso do parque situado na contorna do Local Social da Gracia, Abal indicou que os columpios foron roubados hai tempo sen que se procedese á súa reposición e que o chan presenta irregularidades que dificultan un uso seguro do espazo.
Ante este escenario, a concelleira socialista reclamou ao Goberno municipal que preside Goretti Sanmartín unha intervención inmediata para corrixir as deficiencias detectadas. Abal instou a que se acondicionen os pavimentos, se reparen ou substitúan os elementos de xogo deteriorados e se restablezan os columpios desaparecidos, co obxectivo de garantir que estes espazos cumpran as condicións necesarias de seguridade.
A edil subliñou que “os nenos e nenas de Santiago merecen gozar dos seus parques con seguridade” e asegurou que desde o seu grupo municipal manterán a reivindicación ata que se adopten as medidas necesarias para solucionar as carencias existentes nestas áreas de lecer infantil da cidade.
