O persoal do Servizo de Prevención e Defensa contra Incendios Forestais (SPIF) sairá ás rúas de Santiago de Compostela o próximo 30 de outubro convocado pola CIG-Administración Autonómica, que reclama un servizo de incendios “público, digno e con garantías laborais”.
Segundo informou o sindicato, a manifestación partirá ás 11:00 da Consellería do Medio Rural e rematará diante do complexo administrativo de San Caetano, sede da Xunta. A protesta busca visibilizar as demandas do persoal do SPIF, que reclama un servizo de extinción “100% público e único”, no que todos os traballadores conten coas mesmas condicións e se lles garanta “a saúde e a seguridade” no desempeño das súas funcións.
A CIG denuncia o “abandono, a desigualdade e a mala xestión” do servizo por parte da administración autonómica, o que, segundo o sindicato, “pon en risco de morte aos traballadores e á poboación”. Entre as principais reivindicacións figura o aumento do período de traballo do persoal fixo-discontinuo, que actualmente é de oito meses, ata os doce meses, co obxectivo de que poidan asumir tarefas de prevención forestal e de resposta ante multiemergencias. Esta medida, sinalan, permitiría dotar de maior estabilidade e continuidade o emprego.
Outra das demandas pasa por estender o Acordo do persoal funcionario do SPIF ao persoal laboral, en aplicación do principio de “igual traballo, igual salario e condicións laborais”.
Ademais das cuestións laborais, o sindicato apunta á necesidade de mellorar a coordinación e planificación da Consellería do Medio Rural durante a vaga de incendios, advertindo de que a “descoordinación e a improvisación” observadas este verán “poñen en perigo tanto ás persoas como ao territorio galego”.
