Con motivo do Día Mundial da Prevención do Suicidio, o Movemento Galego da Saúde Mental (MGSM) fai un chamamento á cidadanía galega para participar no acto ‘Badaladas pola Prevención do Suicidio’, que se celebrará este martes ás 20:00 na Praza de Praterías en Santiago. A organización subliña a importancia de visibilizar o suicidio como un dos principais problemas de saúde pública en Galicia, onde “case cada día” morre unha persoa por esta causa.
Segundo datos do Ministerio de Sanidade, cada día 12 persoas de Galicia contactan coa Liña 024 de prevención do suicidio. Por iso, o MGSM considera que este martes debe servir tanto para lembrar a gravidade do suicidio como para reivindicar a implementación de accións preventivas eficaces que permitan reducir estas traxedias.
O evento en Santiago enmárcase na campaña global promovida pola Asociación Internacional da Prevención do Suicidio (IASP), co lema deste ano ‘Cambiar a narrativa’, que busca abrir un diálogo honesto sobre a realidade do suicidio e transformar a percepción social sobre este tema.
