HomeSANTIAGOAparece unha xanela románica na Catedral de Santiago despois dunhas obras de...

Aparece unha xanela románica na Catedral de Santiago despois dunhas obras de rehabilitación

Os técnicos explicaron que a xanela románica estaba detrás do retablo e quedou accesible tras o seu desmonte no proceso de rehabilitación

Publicado o

Por Xornal de Compostela

Unha xanela románica foi achada na Capela do Salvador da Catedral de Santiago de Compostela durante as obras de rehabilitación que impulsa a Xunta en colaboración coa Fundación da basílica.

O descubrimento, do que informou o Goberno galego nun comunicado, foi visitado este martes polo conselleiro de Cultura, Lingua e Xuventude, José López Campos, nunha visita co arcebispo, José Prieto, e o director da Fundación Catedral, Daniel Lorenzo, ás actuacións.

No percorrido polas obras que levan a cabo tanto na capela do Salvador como de San Bartolomé, os técnicos explicaron que a xanela románica estaba detrás do retablo e quedou accesible tras o seu desmonte no proceso de rehabilitación.

Ademais, as actuacións que se están levando a cabo nestes espazos, incluídas no convenio de colaboración coa Fundación Catedral, están a permitir recuperar as pinturas murais e os relevos pétreos e supoñen, no seu conxunto, un investimento de 250.000 euros.

Neste sentido, o responsable autonómico de Cultura puxo en valor a importancia da colaboración con entidades como a Fundación Catedral para levar a cabo actuacións tan complexas como estas que garanten que “un dos maiores tesouros de todos os galegos sexa legado ás próximas xeracións nas mellores condicións” ademais de ampliar o coñecemento que temos sobre este monumento.

Nesta mesma liña, o conselleiro lembrou “o firme compromiso que o Goberno galego mantén desde o ano 2009 coa conservación desta basílica” na que, co apoio da Xunta de Galicia, levaron a cabo distintas intervencións nas fachadas, torres ou cubertas. Trátase dun compromiso que, tal e como destacou, continúa vixente co Plan Catedrais de Galicia, a folla de ruta dotada con 38 millóns de euros para actuar nos grandes templos galegos co horizonte de 2027.

No marco deste plan, ademais das intervencións que están en marcha nas capelas absidais do Salvador e San Bartolomé, tamén está previsto destinar, este 2024, 350.000 euros para a posta en valor da capela do Cristo de Burgos, intervencións que abarcan a fachada ao patio de Xelmírez e o proxecto de restauración do interior da capela.

ÚLTIMAS

Falece o mozo que sufriu unha caída de 8 metros nun rocódromo de Costa Vella

O mozo que sufriu, o pasado 17 de xuño, unha caída de oito metros...

Sufocado un incendio no interior dun alpendre en Teo

Sufocado o incendio no interior dun alpendre no núcleo de Calo, no concello coruñés...

Isto custa ir de Santiago a Coruña e Vigo pola AP-9

Todos aqueles galegos que están acostumados a empregar a carísima autopista AP-9 como vía...

A Xunta mantén o financiamento para o novo parque de bombeiros en Amio

A Xunta de Galicia confirmou que non se oporá ao cambio de localización do...

Revogado o Doutoramento en Xestión Sustentable da Terra e do Territorio da USC

O Diario Oficial de Galicia (DOG) publicou este luns a orde coas revogacións dun...

Científicos da USC lanzan un manifesto contra a “macrocelulosa” de Altri

Científicos dos departamentos de Botánica, Bioloxía e Zooloxía da Universidade de Santiago de Compostela...

O Departamento de Historia da Arte da USC alerta sobre os impactos do proxecto de Altri na Ulloa

O Departamento de Historia da Arte da Universidade de Santiago de Compostela expresou a...