O Concello de Santiago xa procedeu á limpeza da pintada coa que apareceu vandalizada a estatua de Moncho Reboiras, inaugurada o pasado mes de abril. O monumento, co que o goberno local quixo homenaxear ao militante nacionalista asasinado pola policía franquista, fora cuberto con pintura vermella e unha mensaxe en árabe xunto á placa conmemorativa.
Ante este ataque, o executivo municipal manifestou o seu rexeitamento a “todos os comportamentos contrarios á convivencia cidadá”. Pola súa banda, o PP aproveitou o incidente para criticar a xestión da limpeza urbana. O seu portavoz, Borja Verea, afeou que outras pintadas e espazos abandonados non reciban a mesma “rapidez nin prioridade” por parte do goberno de Goretti Sanmartín. “Cada vez está máis claro cales son as prioridades deste goberno”, censurou o líder popular.
Fontes municipais negaron calquera trato de favor nesta actuación, asegurando que a limpeza de actos vandálicos se realiza “coa mesma dilixencia en todos os casos” por toda a cidade.
