O Concello de Santiago respondeu ás críticas formuladas polo Partido Popular sobre a falta de actuación no muro do parque de Bonaval asegurando que o proceso administrativo e técnico segue en marcha e que xa se iniciaron os pasos necesarios para definir a intervención tras o derrubamento rexistrado no mes de febreiro.
Segundo trasladou o executivo municipal, o Servizo de Supervisión de Proxectos e Obras formalizou a contratación dun estudo técnico especializado para analizar a situación do muro e establecer as solucións máis axeitadas. A empresa adxudicataria é ‘EPTISA, Servicios de Ingeniería, S.L.’, que se encargará da redacción dun informe sobre as patoloxías e a estabilidade estrutural do elemento.
O Concello explicou que este estudo permitirá determinar as causas do derrubamento, avaliar o estado do resto do muro e propoñer alternativas de reparación, incluíndo unha estimación económica das actuacións necesarias. Entre os traballos previstos figuran un levantamento topográfico detallado, a monitorización de movementos, a realización de ensaios xeotécnicos e unha análise estrutural completa.
INICIO INMEDIATO DOS TRABALLOS
Na xornada do 14/04/2026 mantívose unha primeira reunión de coordinación coa empresa encargada, na que se definiu o calendario de actuación. Segundo indicaron fontes municipais, o levantamento topográfico da zona comezará de inmediato, xa que a empresa confirmou a súa dispoñibilidade para iniciar estes traballos xa ao día seguinte.
Posteriormente desenvolveranse as catas e ensaios xeotécnicos para analizar o comportamento do terreo, tras o que se elaborará o informe técnico definitivo. O prazo estimado para completar esta fase é de aproximadamente tres meses.
Este documento será clave para a seguinte etapa, na que se redactará o proxecto técnico de intervención, unha fase que o Concello prevé desenvolver en coordinación co Consorcio da Cidade de Santiago de Compostela, cuxa colaboración está a ser estudada.
INTERVENCIÓN CONDICIONADA POLO VALOR PATRIMONIAL
O goberno local subliñou que a actuación debe axustarse aos criterios establecidos polos organismos competentes en materia de patrimonio, dado que o ámbito de Bonaval está declarado Ben de Interese Cultural (BIC). Neste sentido, indicou que a solución definitiva deberá contar coa validación da Comisión Asesora de Patrimonio Cultural.
Dende o Concello insístese en que o proceso se está a desenvolver con “rigor técnico, prudencia e respecto ao valor patrimonial”, co obxectivo de garantir a estabilidade, a seguridade e a conservación dun espazo de especial relevancia histórica na cidade.
