A concelleira do Grupo Municipal Socialista en Santiago, Marta Abal, instou o Goberno local á elaboración e publicación dun plan específico de conservación e mantemento dos ríos Sar e Sarela, co obxectivo de previr inundacións e reducir os riscos para a veciñanza. A proposta foi presentada polos socialistas no pleno municipal do pasado mes de marzo, onde resultou aprobada.
A iniciativa xorde tras os episodios rexistrados nos últimos invernos, nos que o incremento do caudal destes cursos fluviais, asociado ás precipitacións intensas, provocou inundacións e danos en vivendas, especialmente na contorna da rúa Ponte Pereda, no barrio de Conxo. Segundo explicou Abal, estas situacións poñen de manifesto a necesidade de actuar con antelación, xa que “os troncos, pólas e material vexetal arrastrados polos ríos reducen a súa capacidade de drenaxe e agravan o risco de inundación”.
A concelleira advertiu de que Santiago conta con dúas zonas catalogadas como de risco potencial de inundación, un escenario que, segundo indicou, se ve agravado polo contexto climático actual. Neste sentido, sinalou que “as tarefas de mantemento habituais xa non son suficientes” para facer fronte a este tipo de episodios.
Desde o Grupo Municipal Socialista propoñen avanzar cara a medidas preventivas de maior alcance, así como reforzar a colaboración institucional. En particular, Abal reclamou a implicación de Augas de Galicia para actuar nas áreas máis vulnerables e “minguar os riscos para as persoas e os bens”.
Outro dos aspectos destacados pola concelleira foi a necesidade de mellorar a transparencia e o control das actuacións. Neste sentido, solicitou que o futuro plan contemple a publicación periódica dos traballos realizados, así como dos recursos destinados a estas tarefas.
“Santiago precisa planificación, prevención e información clara á cidadanía para facer fronte a un problema que vai a máis”, subliñou Abal.
Por último, a edil socialista avanzou que o seu grupo realizará un seguimento da iniciativa para garantir a posta en marcha de medidas “eficaces e sostidas no tempo” que permitan reducir o impacto das inundacións na cidade.
