A corporación municipal de Santiago de Compostela aprobou este xoves por unanimidade unha declaración institucional na que solicita á Xunta de Galicia e ao resto de administracións competentes que adopten “de forma inmediata” as medidas necesarias para garantir a retirada dos residuos depositados na canteira de Miramontes e a posterior recuperación ambiental da zona.
O acordo foi alcanzado antes da celebración do pleno, polo que a moción presentada polo Goberno local —integrado por BNG e Compostela Aberta— non chegou a ser debatida na sesión. A declaración contou co respaldo de todos os grupos con representación municipal: BNG, Compostela Aberta, PP, PSOE e as concelleiras non adscritas.
A iniciativa prodúcese despois de que, no pasado mes de febreiro, a Audiencia Provincial da Coruña ratificase a existencia dun delito contra o medio ambiente na explotación, vinculada á actividade da empresa Tecnosolos Galaicos. Neste contexto, a corporación considera “inaceptable” que a situación continúe sen unha solución definitiva desde o punto de vista ambiental.
No texto aprobado, o Concello asume as demandas trasladadas pola Federación de Asociacións Veciñais do Rural de Santiago e pola Plataforma de Afectadas pola Canteira de Miramontes. Entre as peticións, figura a elaboración dun calendario de actuacións con prazos concretos, así como a necesidade de informar con “transparencia” sobre o estado actual da canteira, os riscos ambientais existentes e as medidas técnicas previstas para evitar novos impactos durante o proceso de restauración.
A declaración tamén cualifica a situación da canteira como un “exemplo grave de degradación ambiental”, asociado á falta de control público e á desprotección da veciñanza ao longo dos anos. Ademais, lembra a implicación do propio Concello neste conflito, que chegou a trasladar o caso á Fiscalía.
DECLARACIÓN POLO DÍA INTERNACIONAL DO POBO XITANO
Na mesma sesión, a corporación aprobou outra declaración institucional con motivo do Día Internacional do Pobo Xitano, na que se subliña a necesidade de reforzar o compromiso das institucións para facer fronte ás desigualdades que afectan a este colectivo.
O texto sinala que problemáticas como a pobreza, o fracaso escolar, a desigualdade no acceso ao emprego ou a segregación residencial e educativa deben abordarse mediante políticas públicas e investimentos adecuados. Así mesmo, insta a ir máis aló das declaracións institucionais e a traballar para “garantir dereitos”.
