A portavoz do Goberno local de Santiago, Míriam Louzao, confirmou que a familia Franco será quen cubra os gastos do traslado das esculturas do Mestre Mateo Abraham e ‘Isaac’, retiradas do Pazo de Meirás (Sada) e cuxo retorno a Santiago vén marcado pola sentenza do Tribunal Supremo do 18 de xuño de 2025, que recoñece a súa titularidade pública municipal.
Nunha comparecencia ante os medios, Louzao precisou que a representación procesual da familia aceptou asumir un importe de 4.350,77 euros, correspondente ao transporte das dúas pezas desde Meirás até a capital galega. As esculturas serán recolocadas no Museo do Pobo Galego o próximo 11 de decembro, unha vez autorizada a operación pola Dirección Xeral de Patrimonio.
Segundo explicou a concelleira, o proceso de traslado avanza conforme ao previsto e permitirá que Compostela recupere “parte dun patrimonio singular vinculado á súa historia”.
A alcaldesa Goretti Sanmartín tamén se referiu ao regreso das pezas nunha mensaxe publicada nas súas redes sociais o 20 de novembro, coincidindo cos 50 anos da morte de Franco. Nesa comunicación, destacou que a chegada das esculturas supón “un acto de xustiza histórica, de dignidade colectiva e de recuperación de patrimonio”.
A rexedora aproveitou para agradecer o labor desenvolvido por “xuristas, representantes de anteriores corporacións e activistas da memoria” que contribuíron ao proceso e convidou á cidadanía a achegarse ao Museo do Pobo Galego o día da súa chegada, unha xornada que cualificou como “de celebración e de festa”.
