A Consellería de Medio Ambiente informou de que Augas de Galicia intensificou o seguimento da vertedura detectada no río Sar, logo de recibir o pasado domingo unha alerta a través do Programa de Control de Verteduras (PCV). O departamento que dirixe Anxos Vázquez sostén que o episodio ten a súa orixe na Estación Depuradora de Augas Residuais (Edar) de Silvouta, cuxo titular é o Concello de Santiago e o promotor a sociedade estatal Acuaes.
Segundo indicou a Xunta, o organismo de conca actuou de inmediato e constatou que a depuradora presentaba un efluente moi turbio, de cor marrón e con cheiro a fecais, polo que se recolleron mostras e se iniciou un control da evolución do río. As inspeccións posteriores revelaron un aumento da afección, que se estende desde Compostela ata o municipio de Padrón, polo que se realizaron análises augas arriba e abaixo do punto de vertedura.
O martes, Augas de Galicia remitiu oficios ao Concello de Santiago e a Acuaes para instar á adopción “inmediata” das medidas necesarias. Porén, o mércores detectouse un novo empeoramento da situación, con presenza de contaminación ata a desembocadura do Sar no Ulla.
Desde a Edar informouse de que este xoves se puxo en marcha o proceso físico-químico da nova instalación, co obxectivo de someter o efluente a un tratamento máis completo. A Xunta confirmou que este venres o PCV realizará unha nova inspección e tomará mostras tanto do efluente tratado como do propio río, para comprobar se a contaminación diminúe.
Unha vez dispoñibles os resultados analíticos, a Consellería anunciou que avaliará os danos ocasionados e iniciará as actuacións administrativas correspondentes. O departamento autonómico lembrou que “o Concello, como titular da autorización de vertedura, non pode eludir a súa responsabilidade” e debe garantir o cumprimento das condicións establecidas na autorización, que, segundo a Xunta, non se están a respectar desde o pasado fin de semana.
