A Catedral de Santiago foi obxecto de novas pintadas, que apareceron nas últimas horas na fachada da Praza da Inmaculada. Os actos vandálicos volveron ao templo en forma duns nomes escritos en negro, nunha esquina fronte ao acceso ao arcebispado, no lado contrario ás casetas de venda de recordos.
O goberno de Santiago lamentou estes feitos delituosos e lembrou que se realizou unha campaña de concienciación sobre “a importancia de coidar o patrimonio, especialmente nunha cidade como Santiago, considerada Patrimonio da Humanidade”. Este tipo de delitos, que supoñen un dano ao patrimonio público, poden levar tanto sancións administrativas –desde os 300 euros nos casos máis leves– como penais.
PINTADAS ANTERIORES
Ademais doutros danos no templo e na súa contorna en distintos momentos, no ano 2019 xa se produciron cinco pintadas reivindicativas en distintas zonas das fachadas da Catedral, nas que se podían ler mensaxes como ‘Eu non saín da túa costela, ti saíches da miña cona!’ en plena Praza do Obradoiro. Tamén, na zona do Arco de Palacio, líanse mensaxes como ‘Guillotina, Borbón’, ‘Gritaremos ata quedarnos sen Vox’, ‘Non nos pararán’ e ‘Machitos’, estas dúas últimas acompañadas co símbolo feminino debuxado en forma dunha arma. O Concello de Santiago condenou no seu día, a través das redes sociais, esta “agresión ao patrimonio” e púxose a disposición da Catedral para colaborar en todo o que fose necesario.
