A organización ecoloxista Adega e o Concello de Santiago presentaron este martes o proxecto ‘Compostela composta, para á terra ou que é dá terra’, unha iniciativa de reciclaxe de residuos orgánicos que aposta pola compostaxe en tres áreas: educación, hostalaría e agrocompostaxe. O acto de presentación tivo lugar no CIFP Lamas de Abade, onde xa se instalaron composteiros para xestionar os restos xerados polos alumnos de cociña, hostalaría e panadaría.
A presentación contou coa presenza de Xesús Domínguez, concelleiro de Medio Ambiente de Santiago, María Amigo, educadora ambiental de Adega, e o director do CIFP, Ramiro Esmorís. A proposta busca fomentar a xestión de residuos desde a orixe, promovendo a recollida selectiva e un tratamento sostible que permita reducir custos e impacto ambiental.
Segundo explicou Domínguez, esta iniciativa axuda a reducir os custos de xestión e transporte de residuos orgánicos no Concello, avanzando cara a unha Compostela “máis sostible e boa de vivir”. O proxecto xa conta con 11 illas de compostaxe comunitaria distribuídas pola cidade e preto de 1.500 colectores individuais que dan servizo a unhas 5.000 persoas.
Para o CIFP Lamas de Abade, o programa supón un avance significativo, dado o volume de residuos orgánicos que se xeran nas súas actividades formativas. Este centro é o primeiro dunha serie de 10 centros educativos aos que se espera estender o programa, co obxectivo de concienciar aos estudantes sobre a importancia do tratamento de residuos.
A idea de Adega e do Concello é que ‘Compostela composta’ continúe a medrar, integrando a compostaxe tamén en comedores universitarios, hospitalarios e escolares, así como no sector agrícola, logrando que máis ámbitos da cidadanía se sumen ao modelo de xestión sostible.
