Actemsa, empresa galega líder na importación e exportación de peixe conxelado, foi a sede da última sesión plenaria da Cámara de Comercio de Santiago, celebrada no Polígono de A Tomada, na Pobra do Caramiñal. Esta iniciativa forma parte da estratexia de “deslocalización” dos Plenos camerales, co obxectivo de conectar máis estreitamente co tecido produtivo local.
José Luis Escurís Villa, director xeral e vicepresidente de Actemsa, exerceu de anfitrión nesta reunión, que contou coa presenza destacada de José González, conselleiro de Emprego, Comercio e Emigración, e de Gabriel Alén, director xeral de Comercio e Consumo. A presidenta da Cámara, María Pais, tamén participou activamente na sesión.
José Luis Escurís resaltou a traxectoria de Actemsa como un “exponente da empresa familiar”, mencionando o compromiso continuo da compañía por ampliar e blindar o emprego, especialmente tras superar a crise global que impactou o sector pesqueiro.
O conselleiro José González destacou o papel vital da Cámara de Comercio na representación dos intereses de máis de 30.000 empresas e autónomos da provincia, e eloxiou a súa capacidade para servir de ponte entre a administración pública e o sector privado.
María Pais subliñou o compromiso da Cámara co fortalecemento e a promoción do crecemento empresarial e do emprego na zona. Remarcou a importancia de traballar en colaboración coa Xunta de Galicia para facilitar a integración das políticas públicas no sector empresarial e para expresar as inquietudes empresariais ás diferentes administracións.
Actemsa, con 30 anos de historia, iniciou a súa actividade en 1994 e destacouse pola súa adaptación e evolución constantes no sector pesqueiro global. A empresa é un referente na importación de atún das tres grandes áreas pesqueiras mundiais: Latinoamérica, África e Asia, e ofrece servizos de conxelación e asistencia técnica a empresas conserveras e pesqueiras.
