A Sociedade para a Promoción de Iniciativas Empresariais Innovadoras (Uninova), entidade participada maioritariamente polo Concello de Santiago, sacou a licitación pública, por importe de 108.000 euros, a asistencia técnica para a recompilación e análise de datos de cara á posta en marcha da futura plataforma loxística de distribución de mercadorías no centro histórico de Santiago, un estudo no que se inclúa análise de demandas e necesidades.
De tal forma, con este contrato crearase un gabinete técnico (no marco do Plan de Recuperación e con fondos europeos Next Generation) para a prestación de servizos necesarios a incluír na plataforma loxística que se proxecta no polígono do Trambre. Segundo explica a xustificación do proxecto, a actuación “procurará a optimización da repartición de mercadorías no centro histórico” coa creación dun centro de consolidación de mercadorías e a repartición do mesmo. Para isto, construirase unha plataforma loxística de distribución que centralizará esa repartición na zona monumental.
En concreto, o proxecto arrincará cos negocios hostaleiros do sector Horeca, “para posteriormente poder estenderse a máis sectores”. Os traballos a realizar serán os seguintes: análise da demanda, clarificación de ‘target‘ da plataforma, fluxos a atender, modelo de captación, volumes a transportar e posible evolución temporal e tipolóxica. Así, observarase a mobilidade de estimación dos desprazamentos xerados, rutas optimizadas, tipoloxía de vehículos con impactos de tráficos.
A repartición na zona monumental carrexa problemas para os veciños desde hai anos en Compostela, con decenas de camións e furgonetas que discorren por patrimonio da humanidade entre traseúntes e turistas nas mañás de xornadas laborais en diferentes zonas do centro histórico, con varios puntos negros como a Praza do Toural ou a praza de abastos. Precisamente, a pasada semana, a alcaldesa de Santiago, Goretti Sanmartín, apuntou a esta plataforma loxística que se construirá no polígono do Tambre como unha das cuestións nas que se vai a traballar “de maneira moi intensa”, coa intención de que o orbital chegue tamén ata este nodo.
