Economistas do equipo de Hispalink Galicia da Universidade de Santiago de Compostela (USC) fixeron públicas previsións para os próximos anos nas que prevén que o Produto Interior Bruto (PIB) da comunidade creza un 1,8 % este 2024, por baixo do 2,2 % de España. Nun comunicado, informan de que será a construción o sector de maior crecemento este ano (2,6 %), seguida da industria (2,4 %). A alza dos servizos será do 1,6 % e en agricultura e pesca, do 1,5 %.
Mentres, auguran unha melloría para 2025, onde a economía galega avanzará un 2,5 %, unha décima máis da media estatal (2,4 %). Xa para 2026, Hispalink prevé que a taxa de crecemento do valor engadido bruto real de Galicia será do 2,3 %, unha décima menos que o 2,4 % do país.
