Santiago de Compostela recibirá en 2026 unha achega de 3 millóns de euros por parte da Xunta de Galicia para contribuír ao financiamento dos custos asociados á súa condición de capital autonómica, despois de que o Consello da Xunta autorizase este luns a sinatura dun convenio de colaboración entre a Consellería de Facenda e o Concello.
A medida inscríbese no marco da Lei 4/2002 do Estatuto de Capitalidade de Santiago de Compostela, a normativa que recoñece oficialmente á cidade como sede das institucións da Comunidade Autónoma e que regula a cooperación entre ambas administracións para facer fronte ás cargas derivadas desa condición institucional.
Segundo destacou o presidente da Xunta, Alfonso Rueda, esta partida responde á obriga recollida no propio estatuto de garantir un financiamento específico para compensar os gastos adicionais que implica para o municipio albergar organismos e servizos centrais da administración galega. A contía prevista para o vindeiro exercicio supón un incremento do 14% respecto ao ano anterior.
Rueda subliñou tamén que, no conxunto da actual lexislatura, o Executivo autonómico elevou en máis dun 25% os fondos destinados á capitalidade compostelá. A este importe súmanse, ademais, os arredor de 2 millóns de euros anuais que o Concello percibe a través do imposto de bens inmobles (IBI) correspondente aos edificios públicos vinculados ás institucións galegas e aos seus servizos administrativos.
A Xunta lembrou igualmente que o apoio económico á cidade vai máis alá desta partida específica, ao incluír tamén investimentos e contribucións noutras áreas como o patrimonio cultural, o turismo, as infraestruturas viarias ou a política lingüística, a través da súa participación en organismos e entidades como o Consorcio de Santiago, a Fundación Cidade da Cultura ou os dispositivos vinculados á seguridade da Catedral.
RAXOI CONSIDERA “INSUFICIENTE” A ACHEGA
A alcaldesa de Santiago, Goretti Sanmartín, cuestionou a contía anunciada pola Xunta ao considerar que os 3 millóns de euros previstos para 2026 non responden ás necesidades reais derivadas da capitalidade compostelá. A rexedora sostivo que o Goberno galego mantén coa cidade “unha débeda histórica” e reclamou unha revisión máis ampla do financiamento previsto no Estatuto de Capitalidade.
“Esta subida non nos parece suficiente”, afirmou Sanmartín, que lembrou que a actualización realizada polo actual executivo municipal do estudo sobre os custos da capitalidade situaba a achega necesaria en arredor de 8 millóns de euros anuais.
A alcaldesa criticou tamén que o incremento anunciado pola Xunta, dun 14% respecto ao exercicio anterior, se presente como un avance relevante. “Entendemos que é simplemente querer quedar ben cunhas cantidades que non hai absolutamente ningunha dúbida de que son totalmente insuficientes”, sinalou, antes de engadir que os importes destinados a Santiago están “moi por debaixo” dos que perciben outras cidades do Estado pola súa condición institucional.
Neste contexto, Sanmartín insistiu en que a Xunta “non está a cumprir con Santiago” e reiterou a necesidade de convocar a Comisión de Capitalidade, o órgano previsto para abordar as relacións e o financiamento entre ambas administracións. Segundo afirmou, este organismo “nunca se reuniu” porque o Goberno galego “non quere enfrontar os datos que están encima da mesa”.
