A SD Compostela estreouse na competición ligueira cunha derrota por 0-3 fronte ao Marino de Luanco no Vero Boquete de San Lázaro. O equipo santiagués levou o peso do partido en diferentes fases e buscou manter as sensacións da pretempada, pero os visitantes aproveitaron as súas ocasións para abrir distancia no marcador e asegurar os tres puntos.
O Compos afrontaba o primeiro compromiso oficial da Liga cun once próximo ao empregado no seu último encontro de preparación, disputado no Memorial ‘Antonio Bermúdez’. Desde o inicio, o conxunto compostelán tratou de imprimir velocidade ao xogo e buscar espazos nos costados da defensa asturiana.
Os primeiros minutos deixaron maior posesión e iniciativa local, aínda que o Marino de Luanco conseguiu adiantarse na súa primeira chegada con perigo. Unha acción rápida posterior a unha falta permitiu a Juan Quirós superar a defensa compostelanista e establecer o 0-1.
O gol non modificou inicialmente o plan do Compostela. Os santiagueses continuaron intentando avanzar polas dúas bandas e instalarse preto da área rival, pero tiveron dificultades para transformar esas chegadas en ocasións claras.
O equipo asturiano, pola contra, atopou espazos cando recuperaba o balón. Nunha transición iniciada no centro do campo, Basurto impúxose na banda e serviu o balón para a chegada desde segunda liña de Guille Cueto, que ampliou a vantaxe visitante co 0-2.
O segundo tanto complicou o encontro para un Compostela que mantivo a iniciativa antes do descanso. Co apoio da bancada do Vero Boquete, os locais intentaron superar a presión e o xogo defensivo do Marino, aínda que non conseguiron reducir diferenzas antes de que os dous equipos marchasen aos vestiarios.
O COMPOS BUSCOU O GOL TRALO DESCANSO
O desenvolvemento do partido mantívose tras a reanudación. O Compostela asumiu a posesión mentres o Marino de Luanco protexía a súa vantaxe cun bloque máis atrasado e trataba de aproveitar os espazos que deixaban os locais na procura do gol.
Os cambios introducidos desde o banco permitiron ao conxunto santiagués incrementar a súa presenza ofensiva. Teo dispuxo dunha das opcións máis claras, mentres que Ces Cotos probou fortuna cun disparo desde a frontal. Dani González tamén contou cunha segunda acción coa que o Compos puido achegarse no marcador, pero ningunha das tentativas terminou en gol.
Cando os locais estaban máis volcados sobre a portería asturiana, chegou a acción que pechou definitivamente o partido. Samu Pérez culminou un novo contragolpe do Marino, beneficiándose dun rexeitamento na propia xogada para rematar e colocar o 0-3 definitivo.
Deste xeito, a SD Compostela comeza a Liga sen puntuar diante da súa afección, despois dun partido no que a maior posesión e as chegadas locais non tiveron correspondencia no marcador ante un Marino máis efectivo nas transicións.
O calendario ofrece agora unha oportunidade inmediata para deixar atrás o resultado. O Compostela volverá competir este mércores no Vero Boquete, onde disputará os dezaseisavos de final da Copa Federación.
