A alcaldesa de Santiago de Compostela, Goretti Sanmartín, avanzou este mércores que o Goberno local xa ten elaborada unha proposta de orzamentos municipais para 2026, que será a base das negociacións políticas necesarias para a súa aprobación. O executivo, conformado por BNG e Compostela Aberta, precisa do respaldo do PSOE e das concelleiras non adscritas para sacar adiante as contas no pleno.
Segundo explicou a rexedora durante unha rolda de prensa, o Executivo municipal xa trasladou un resumo do contido da proposta tanto ao grupo socialista como ás edís non adscritas. “O que fixemos foi trasladarlle o resumo das cuestións que aparecen aí tanto ao Partido Socialista como ao grupo de concelleiras non adscritas e o que faremos será ter, nos próximos días, reunións para tentar chegar a un acordo sobre esa proposta orzamentaria”, sinalou.
A alcaldesa confirmou que as reunións de negociación están xa programadas, aínda que evitou concretar datas co obxectivo de preservar a discreción do proceso. “Unha vez teñámolas e que falemos, faremos público cal é máis ou menos o parecer”, indicou, en referencia aos resultados deses encontros.
O actual Goberno local atópase en minoría, polo que necesita sumar os votos dos dous edís do PSOE e das catro concelleiras non adscritas, que foron expulsadas do grupo socialista no primeiro semestre de 2025. Estes apoios xa resultaron determinantes no inicio do mandato para facilitar a investidura do actual Executivo, sen formar parte del.
Sanmartín mostrouse optimista ante a posibilidade de volver aprobar unhas novas contas municipais e lembrou os precedentes dos últimos exercicios. “Díxose moitas veces que un goberno en minoría non tiña posibilidade de ter orzamentos e tivémolos nunha primeira e segunda ocasión. A nosa intención é volver telos”, afirmou, apuntando á continuidade da liña de traballo seguida nos dous últimos anos.
