O pleno extraordinario do Concello aprobou este luns o pagamento das facturas pendentes correspondentes a pequenos provedores, por un importe superior aos 366.500 euros, mentres volveu rexeitar o expediente relativo a Viaqua, cuxo montante ascende a preto de 992.400 euros. Trátase da cuarta sesión plenaria na que se aborda este asunto, despois de que a convocatoria extraordinaria, realizada o pasado venres, permitise nesta ocasión votar por separado ambos bloques de facturas.
Tras algo máis de media hora de debate, a proposta de aboar as facturas de Viaqua contou co apoio do BNG, Compostela Aberta e o PSOE, mentres que os concelleiros non adscritos optaron pola abstención e o PP votou en contra, o que provocou o rexeitamento do punto ao non acadar maioría suficiente. Pola contra, no caso das facturas dos pequenos provedores, o voto favorable das formacións do goberno local e dos socialistas, xunto ás abstencións dos non adscritos e do PP, permitiu que o pagamento saíse adiante.
Unha vez ratificada a urxencia da convocatoria —coa abstención do grupo popular—, o concelleiro de Facenda, Manuel César, subliñou que nesta cuarta ocasión o expediente chegaba ao pleno “acompañado de varios informes que resolven as dúbidas sobre a suposta ilegalidade expresada” polo PP, defendendo a viabilidade do procedemento.
Desde o grupo dos non adscritos, Gonzalo Muiños criticou que a alcaldesa, Goretti Sanmartín, “negásese” inicialmente a separar no pleno 93 facturas doutros provedores das 26 correspondentes a Viaqua. “Estiveron máis preocupados en buscar a quen botarlles as culpas que en conseguir pagar”, afirmou. Nunha segunda intervención cualificou a situación de “espectáculo bochornoso” pola falta de entendemento entre goberno e oposición, e xustificou a abstención do seu grupo ao lembrar que o executivo local “ademais da obriga de pagar, tamén ten a obriga de contratar conforme á lei”.
Pola súa banda, a concelleira socialista Marta Abal defendeu “facer todo o posible para que os provedores cobren”, aínda que advertiu de que non se debe “normalizar o recoñecemento extraxudicial”. Nesa liña, avogou por “avanzar en regularizar as prestacións para garantir que os provedores cobren en tempo e forma”.
Desde o PP, Borja Verea mostrouse “alucinado” pola convocatoria dun pleno extraordinario “un mes e tres plenos despois” e sinalou que, ante a abstención dos non adscritos, o seu grupo se vía “na obrigación de ter que tomar unha decisión fundamental”. Segundo indicou, o foco debía poñerse nas “irregularidades” detectadas, defendendo unha postura “coherente” fronte ás “présas” e ás “chapuzas”, e suxerindo revisar a existencia de beneficio industrial nas facturas.
O concelleiro de Facenda replicou que “o informe demostra que o que se está pagando está dentro dos prezos de mercado” e acusou ao portavoz popular de “manipular o que aparece nos informes para sacar beneficio político”.
No peche do debate, a alcaldesa Goretti Sanmartín reivindicou a actuación do goberno municipal “por responsabilidade coas empresas, cos traballadores e coa veciñanza” e cualificou de “absoluto erro” pretender pagar unhas facturas e outras non. Segundo advertiu, o Concello “acabará pagando con intereses estas facturas”, polo que considerou que “o lóxico sería favorecer que se pague o conxunto das facturas”.
