A aerolínea neerlandesa KLM anunciou a posta en marcha dunha nova ruta aérea que conectará Santiago de Compostela con Ámsterdam a partir do 30 de maio de 2026, segundo a información publicada pola propia compañía na súa páxina web. A conexión terá carácter estacional e estenderase ata o 24 de outubro do mesmo ano.
O calendario de operacións estará organizado por fases. Entre o 30 de maio e o 3 de xullo, os voos realizaranse os sábados e domingos. A partir do 4 de xullo e ata o 30 de agosto, a ruta pasará a contar con frecuencias diarias, mentres que no último tramo, entre o 31 de agosto e o 24 de outubro, volverá operar unicamente nas fins de semana.
Segundo o horario previsto, a saída desde Ámsterdam efectuarase ás 13:45, con chegada ao aeroporto Rosalía de Castro ás 16:10 hora local. Pola súa banda, os voos desde Santiago de Compostela despegarán ás 16:40, aterrando na capital neerlandesa ás 19:05. A operativa realizarase con aeronaves Embraer 190 ou Embraer 175, modelos habituais nas rutas de medio percorrido da compañía.
Na presentación do novo destino, KLM define Santiago como a “porta histórica” de entrada a Galicia e subliña a súa “rica cultura, a súa refinada gastronomía e o seu papel como punto final do mundialmente famoso” Camiño de Santiago, elementos que, segundo a aerolínea, reforzan o atractivo da cidade no mercado internacional.
Con esta incorporación, Santiago de Compostela pasa a formar parte dos novos destinos europeos de verán de KLM para 2026, xunto coa illa británica de Jersey e Oviedo, ampliando así a oferta de conexións internacionais desde o aeroporto compostelán e consolidando a súa posición dentro da rede aérea europea durante a tempada alta.
NOVAS RUTAS TAMÉN A DUBLÍN
A este anuncio súmase tamén o reforzo da conexión aérea entre Santiago de Compostela e Irlanda, tras confirmarse que Aer Lingus incorporará unha ligazón adicional entre Lavacolla e Dublín durante a tempada de verán de 2026. Segundo trasladaron fontes da aerolínea a Europa Press, este incremento permitirá elevar a oferta actual ata os cinco voos semanais entre ambas as dúas cidades.
O novo servizo consistirá nun voo semanal de ida e volta, que operará todos os sábados entre o 30 de maio e o 12 de setembro de 2026. Esta frecuencia extra coincidirá, ademais, coa semana na que o aeroporto de Santiago reabrirá ao tráfico aéreo tras permanecer un mes pechado por obras, segundo a planificación prevista. No caso do voo con saída desde Santiago, o despegue está programado ás 16:50, con chegada a Dublín ás 18:00, mentres que desde a capital irlandesa partirá ás 12:50, aterrando en Compostela ás 16:10.
Este reforzo de Aer Lingus inscríbese nun contexto de reconfiguración das conexións aéreas de Lavacolla, marcado polos anuncios de novas rutas tras o peche da base de Ryanair en Santiago, comunicado pola compañía irlandesa no mes de setembro. A decisión de Ryanair xerou críticas por parte do persoal afectado, ao aplicarse un expediente de regulación de emprego (ERE), así como reaccións por parte de distintas institucións locais e autonómicas.
Nos últimos meses, o aeroporto compostelán vén sumando novas conexións internacionais. A propia Aer Lingus anunciou recentemente que operará unha ruta directa con Cork, con dúas frecuencias semanais, mentres que en outubro United Airlines confirmou a apertura dunha conexión entre Santiago e Newark, en Nova Jersey, cun total de tres voos semanais. Estes anuncios, xunto coa nova ruta de KLM con Ámsterdam, amplían a oferta internacional de Lavacolla de cara á tempada estival de 2026.
