A sección segunda da Sala do Contencioso-administrativo do Tribunal Superior de Xustiza de Galicia (TSXG) acordou este martes denegar a suspensión cautelar solicitada pola Asociación Unión Hotelera Compostela contra a recarga municipal aplicada polo Concello de Santiago ao imposto autonómico sobre estadías turísticas.
No auto, contra o que non cabe recurso, o tribunal subliña que non entra a valorar a validez da coñecida como taxa turística, cuestión que se examinará cando se dite sentenza. “Non é o momento procesual en que se deba analizar o fondo da cuestión, nin de prexulgar a validez ou invalidez da regulación impugnada”, recolle a resolución.
Tras ponderar os intereses en conflito, os maxistrados conclúen que “non se evidencia que sexa de superior rango o interese sostido pola asociación recorrente en evitar a aplicación do tributo que o interese público inherente aos investimentos e gastos aos que o importe recadado afecta e a finalidade extrafiscal fixada pola disposición legal que o crea”.
O TSXG lembra que o mero feito de que a recarga entre en vigor non inutiliza o recurso presentado pola asociación, que poderá ser resolto no momento oportuno. Para acordar unha suspensión cautelar, engaden, sería preciso que a parte recorrente demostrase “de que forma afecta á súa esfera xurídica ou patrimonial a aplicación da disposición durante o tempo que dure o procedemento”.
Na súa análise, a Sala conclúe que non existe un prexuízo económico inmediato e evidente para o colectivo hoteleiro, xa que o gravame non recae directamente sobre os establecementos senón sobre os seus clientes. Así mesmo, considera que a aplicación da norma durante a tramitación do recurso non xera danos irreparables nin de difícil reparación.
