A alcaldesa de Santiago, Goretti Sanmartín, manifestou este domingo que confía en que haxa “boa sintonía” na reunión prevista para este luns coa Xunta de Galicia, na que se analizará a declaración da capital galega como zona de mercado residencial tensionado.
Sanmartín subliñou que o procedemento “ten que seguir adiante” porque “beneficia aos veciños da cidade ao permitir unha regulación dos prezos”, cuestión que cualificou de “importante para todo o mundo”. A rexedora explicou que o encontro entre técnicos das dúas administracións debe servir tanto para “escoitar” como para “argumentar e xustificar” por que Compostela cumpre cos requisitos establecidos na lei.
A alcaldesa advertiu de que, ao estar o procedemento xa iniciado, “non se debe ir a ese desistimento”, senón continuar coa solicitude. “Nós entendemos que non hai que volver á ficha inicial, senón aclarar todo aquilo que sexa necesario”, engadiu.
En todo caso, Sanmartín destacou a súa “boa vontade” de chegar a acordos co Executivo galego e comprometeuse a fornecer “todos os datos que se lles soliciten” para avanzar no proceso.
A declaración de Santiago como zona tensionada suporía a posibilidade de limitar a suba dos alugueiros en áreas da cidade onde os prezos se dispararon nos últimos anos, un asunto que está a xerar debate político e social na capital galega.
