O Biopolo da Sionlla, en Santiago de Compostela, acolleu esta mañá a visita dun grupo de doce mozas e mozos que participan no programa Xuventude Mentoring na Empresa 2025, unha iniciativa de estadías formativas que impulsa a Consellería de Cultura, Lingua e Xuventude da Xunta de Galicia, cofinanciada nun 60% pola Unión Europea a través do programa FSE+ Galicia 2021-2027.
As persoas participantes, de entre 18 e 29 anos e procedentes da comarca compostelá e doutras localidades galegas, están a realizar estadías remuneradas de tres meses en empresas vinculadas a sectores estratéxicos como o biotecnolóxico.
No encontro estiveron presentes a secretaria xeral da Cámara de Comercio de Santiago, Rosa Mary Cardeso, e o xerente da Asociación Área Empresarial do Tambre, José Manuel Beceiro, que actuou como anfitrión. Beceiro destacou que un dos obxectivos do Biopolo foi desde a súa creación “reter o talento que se xera na Universidade de Santiago, principalmente nun sector estratéxico como é o biotecnolóxico”. Ademais, puxo en valor a necesidade da colaboración público-privada, lembrando que neste proxecto participan a Xunta, o Concello de Santiago, a USC, a Cámara de Comercio, a Asociación do Tambre e diferentes clústeres sectoriais.
Pola súa parte, Cardeso incidiu en que programas coma este son fundamentais para enfrontar o reto do desemprego xuvenil, que a nivel estatal rolda o 25%. “Non podemos permitir que os mozos e mozas que se formaron en Galicia teñan que emigrar por falta de oportunidades e se convertan en competidores das nosas empresas nos mercados internacionais”, subliñou. Nesa liña, explicou que a Cámara está a traballar en tres ámbitos: retención e captación do talento, formación práctica e relación fluída entre oferta empresarial e demanda xuvenil.
O programa Xuventude Mentoring abrangue estadías en empresas da provincia da Coruña como Ozoaqua, Televés, Chemical Gama Verde, Espagat, Acar, Cartogalicia, MK20, Segurma, Rivadulla ou Orballo, co obxectivo de facilitar unha primeira experiencia laboral en ámbitos punteiros da economía galega.
