O conselleiro de Educación, Ciencia, Universidades e Formación Profesional, Román Rodríguez, presentou hoxe en Santiago o proxecto de rehabilitación integral do IES Arcebispo Xelmírez II, que contará cun investimento próximo aos 2 millóns de euros e que sae hoxe mesmo a contratación. A previsión é que os traballos comecen en decembro de 2025, cun prazo de execución de nove meses.
Rodríguez explicou que o obxectivo é mellorar o confort e a funcionalidade do centro tanto para alumnado como para profesorado, á vez que se avanza na eficiencia enerxética, cunha redución estimada do consumo do 80%. A actuación enmárcase no Plan de nova arquitectura pedagóxica, a estratexia coa que a Xunta está modernizando os centros educativos da comunidade.
As intervencións previstas inclúen a substitución dos 2.545 m² de cuberta por unha nova de panel sándwich con illamento de lá de roca, a renovación de 143 xanelas e 10 portas con sistemas de rotura de ponte térmico e dobre acristalamento, e a instalación de 174 luminarias LED con sensores de presenza. Tamén se contempla a substitución das antigas caldeiras de gasóleo por catro equipos de biomasa con silo de almacenamento e novos colectores de calefacción, co que se reducirá o impacto ambiental.
Ademais, o proxecto inclúe un sistema SATE de illamento exterior en 2.903 m² de fachada, a renovación da fontanería nos aseos da segunda planta, a colocación de falsos teitos en baños, vestiarios e salón de actos, a mellora da rede de saneamento e o pintado das paredes interiores afectadas polas novas carpinterías. Tamén se actuará na estrutura metálica da cuberta dos vestiarios, que será reparada, eliminando os óxidos e aplicando tratamento protector.
Segundo salientou Rodríguez, trátase dunha intervención “necesaria para garantir a modernización dun centro de referencia en Santiago e para ofrecer un servizo educativo máis eficiente, sustentable e adaptado ás necesidades actuais”.
