O Concello de Santiago e a Cámara de Comercio veñen de formalizar un novo convenio de colaboración destinado a fomentar o espírito emprendedor e reforzar o tecido económico da cidade. A iniciativa, presentada esta mañá pola concelleira de Promoción Económica, María Rozas, conta cun orzamento municipal de 75.000 euros e desenvolverase ao longo de todo o ano 2025.
O acordo estrutúrase arredor de tres liñas estratéxicas: a promoción da cultura emprendedora, o apoio á creación de novas empresas e a consolidación e internacionalización das existentes. Segundo explicou Rozas, búscase que os compromisos recollidos en documentos como a Axenda 2030 ou o Pacto Local polo Emprego teñan unha aplicación práctica, co obxectivo de diversificar a economía local e impulsar a innovación.
Un dos piares fundamentais será o traballo con colectivos con maiores barreiras de acceso ao mercado laboral, como persoas mozas, mulleres ou maiores de 45 anos. ‘Aínda que hoxe estamos aquí tres mulleres, non é representativo da realidade empresarial nin doutros espazos de poder’, sinalou a concelleira, subliñando a importancia de fomentar a igualdade de oportunidades e incrementar o número de proxectos liderados por mulleres.
A presidenta da Cámara, María País, agradeceu o apoio do Concello e destacou que ‘tanto a creación como a consolidación de empresas son o remedio máis eficaz contra o desemprego e a despoboación’. No último ano, segundo os datos ofrecidos, máis de 200 mulleres recibiron asesoramento integral, o que permitiu a creación de máis de 50 empresas, e máis de 137 persoas autónomas participaron en accións formativas.
As accións previstas incluirán xornadas en centros educativos, visitas ao viveiro de empresas, formación en sectores como a intelixencia artificial, redes sociais, atención sociosanitaria ou restauración, e espazos de coworking dixital. O viveiro da Cámara de Santiago está recoñecido como un dos tres mellores do Estado pola Fundación Funcas e a Universidade Rei Juan Carlos.
No eixo da creación empresarial, desenvolverase o programa ‘Emprendedoras’, cun enfoque especial no emprendemento feminino e cun servizo de asesoramento que abrangue desde a idea inicial até a posta en marcha do negocio, incluída a posibilidade de acceder a microcréditos sen avais nin garantías grazas aos convenios da Cámara con entidades financeiras.
En canto á consolidación das empresas, haberá actuacións específicas en transformación dixital, con apoio desde o espazo de coworking ‘ConPostela’, e en internacionalización, a través da rede de cámaras exteriores. En 2024, a Cámara atendeu máis de mil consultas nesta área, e prevé manter cifras similares o vindeiro ano. A secretaria da entidade, Rosa Cardeso, advertiu sobre os desafíos actuais derivados da xeopolítica internacional, como os novos aranceis anunciados por Estados Unidos, que poderían impactar nas exportacións galegas.
O acto pechouse coa vontade compartida de manter e ampliar a colaboración entre as dúas institucións. ‘As cidades non se constrúen só co impulso das administracións públicas, senón tamén co das entidades que forman parte do seu tecido económico’, concluíu Rozas.
