A portavoz do goberno local de Santiago, Míriam Louzao, mostrou a súa confianza en que o proxecto de orzamentos para este ano será aprobado e asegurou “estar segura” de que haberá “responsabilidade e altura de miras” cos veciños de Compostela. Ante as preguntas dos medios este luns pola situación interna do Grupo Municipal Socialista, no que catro concelleiros foron expulsados, Louzao incidiu en que o Executivo local “non quere entrar a valorar a vida interna das organizacións políticas” e insistiu en que se chegou a un acordo con todo o grupo municipal. “Estamos seguros de que haberá responsabilidade e altura de miras cos veciños dun concello que necesita ter aprobados os orzamentos canto antes para poder seguir con normalidade, iso é o que esperamos”, aseverou.
PARCELA PELETEIRO
Noutra orde de cousas, Louzao valorou as declaracións do líder do PP local, Borja Verea, nunha entrevista na Cadena SER, sobre o acordo coa propiedade da parcela de Peleteiro, a Sociedade de Xestión de Activos procedentes da Reestruturación Bancaria (Sareb), para priorizar o uso residencial e destinar o 45 % a vivenda protexida. Neste sentido, a portavoz do goberno local asegurou que Verea “está a faltar á verdade porque reduce un proxecto ao dicir que só se vai a facer vivenda”. “En todo caso, que haxa vivenda é unha das cuestións que máis preocupa á cidadanía nestes momentos, lamentamos que o señor Verea non comparta esa apreciación con absolutamente todo o resto da cidadanía de Compostela”, esgrimiu.
