A Xunta de Galicia respondeu ás críticas da alcaldesa de Santiago, Goretti Sanmartín, sobre a taxa turística, lembrando que a rexedora participou en todas as reunións sobre a medida e aceptou as condicións, incluída a xestión directa por parte dos concellos. Así o aseguraron fontes do Goberno galego despois das declaracións de Sanmartín tras unha reunión co alcalde do Grove, José Antonio Cacabelos, na que a alcaldesa instou a que a Axencia Tributaria de Galicia (Atriga) xestione o imposto e pediu un maior debate coa Administración autonómica.
Desde a Xunta subliñan que a alcaldesa asistiu a tres encontros nos últimos dous meses, nos que se abordaron a tramitación, fundamentos e prazos da taxa turística. Segundo estas fontes, “a rexedora aceptou as condicións establecidas, entre elas que a xestión sería íntegra dos concellos”. Ademais, o Executivo autonómico destaca que se cumpriu en todo momento coas propostas acordadas, afirmando que non houbo “ningunha desviación respecto dos principios da norma”.
En resposta ás críticas de Sanmartín sobre a inclusión da taxa na Lei de Acompañamento aos Orzamentos, en lugar de a través dunha norma específica, a Xunta argumenta que esta fórmula é “a ferramenta máis áxil” para garantir que a medida entre en vigor o 1 de xaneiro de 2025, como solicitaran concellos como o de Santiago.
Engaden que o texto lexislativo foi obxecto de debate no Parlamento, onde os grupos políticos tiveron oportunidade de introducir emendas para mellorar o documento.
Desde a Administración autonómica insisten en que a norma non está deseñada exclusivamente para Santiago, senón que establece un procedemento uniforme aplicable a todos os concellos galegos que desexen implementar a taxa turística. “A súa regulación responde ás necesidades conxuntas de Galicia e non a un único concello”, explicaron.
Con este contexto, a Xunta reafirma a súa posición e alega que as críticas actuais da alcaldesa compostelá contrastan co consenso previo acadado nas reunións realizadas.
