A próxima edición 2027 da Vuelta Ciclista a España sairá de Galicia, concretamente da cidade de Santiago de Compostela, e desenvolverase fóra das datas habituais, do 4 ao 26 de setembro, segundo confirmou a carreira este domingo. En concreto, o comisario do Xacobeo 2027, Marcos Gómez Román, anunciou este domingo en Granada, xunto co director xeral de La Vuelta, Javier Guillén, que Galicia acollerá a saída oficial da edición de 2027 como parte da programación do vindeiro Ano Santo.
Durante a rolda de prensa, Gómez Román valorou esta cita deportiva como un escaparate internacional para a promoción do Xacobeo 2027 e destacou que situará a comunidade galega no punto de mira de milleiros de visitantes e peregrinos. Será a oitava vez que La Vuelta arrinque desde Galicia, a primeira desde 2016, cando comezou desde Ourense, e farao con “unha etapa en liña e inspirada no Camiño de Santiago”.
“Haberá un mínimo de catro etapas e a idea é ter presenza nas catro provincias galegas“, explicou o director xeral da carreira, Javier Guillén, antes da saída da última etapa da edición 2026 deste domingo desde Granada. Ademais, na próxima edición de La Vuelta haberá cambio de datas respecto das máis habituais da rolda nacional, acostumada a comezar no mes de agosto e que nesta ocasión se desenvolverá en setembro debido a que os Mundiais de Estrada adiantan as súas e celebraranse do 24 de agosto ao 5 de setembro, coa proba en liña masculina o 29 de agosto.
