O SD Compostela conseguiu un triunfo de relevancia na Lomba tras vencer por 0-2 ao Arousa, nun encontro directo pola parte alta da clasificación que lle permite recuperar o liderado da liga a falta de catro xornadas para o remate do campionato.
O equipo compostelán saíu ao terreo de xogo cunha proposta clara e foi superior desde os primeiros minutos, xerando varias ocasións de perigo. Maceira chegou a marcar, pero o tanto foi anulado, mentres que Samu probou cun lanzamento de falta que marchou fóra por pouco. Tamén Antón Guisande contou cunha oportunidade inicial, desbaratada polo porteiro local.
A insistencia tivo premio no minuto 26. Nunha xogada iniciada tras unha recuperación de Riki Mangana, o balón pasou por Parapar e Maceira antes de chegar a Antón Guisande, que definiu cun toque sutil ante a saída do gardameta para facer o 0-1. O tanto estivo acompañado pola presenza de arredor de medio milleiro de afeccionados composteláns nas bancadas.
Lonxe de recuar, o Compos mantivo o control do encontro. Unai estivo preto de ampliar a vantaxe cunha vaselina que non atopou portería, pero foi novamente Guisande quen acertou. O atacante aproveitou un desmarque ás costas da defensa para quedar só ante Chema e marcar o 0-2 cun disparo axustado ao primeiro pau.
Coa vantaxe no marcador, o encontro mudou na segunda metade. O Arousa asumiu máis protagonismo co balón e buscou recortar distancias, mais atopouse cun Álex Cobo sólido baixo paus, que respondeu ás tentativas locais. A ocasión máis clara chegou cun remate ao pau tras un centro ao segundo poste.
O Compos tamén dispuxo dunha oportunidade para sentenciar o choque, cunha acción individual de Parapar que non logrou concretar. Finalmente, o marcador non se moveu e os tres puntos viaxaron para Santiago.
Esta vitoria permite ao conxunto compostelán superar ao seu rival directo na clasificación e recuperar as boas sensacións nun momento decisivo da tempada. O equipo afronta agora catro xornadas determinantes, coa próxima cita na casa fronte ao Atlético Coruña Montañeiros.
