O parque do Monte do Gozo será escenario o vindeiro 25 de abril dunha nova edición do ‘VI Cross e a Andaina Solidaria a favor da investigación de Duchenne-Becker. Unha tarde con Samuel’, unha iniciativa que combina actividade deportiva e compromiso social co obxectivo de apoiar a investigación sobre estas enfermidades raras.
A presentación tivo lugar este martes no Pazo de Raxoi, coa participación da concelleira de Deportes, Pilar Lueiro, xunto a Samuel Mata, impulsor da iniciativa, o seu pai Juanma Mata, o presidente da Federación Galega de Atletismo, Iván Sanmartín, e Amador Pena, en representación do Club Atletismo Obradoiro.
Durante a presentación, Lueiro fixo un chamamento á participación cidadá e destacou o papel desta cita no calendario local. “Desde o Concello queremos destacar o exemplo de superación e compromiso de Samuel e da súa familia, agradecer o traballo de toda a xente que o fai posible e subliñar, como concelleira, o valor do deporte como ferramenta de transformación social”, afirmou. A edil tamén sinalou que o evento está “consolidándose xa como un evento de referencia no calendario deportivo e solidario da cidade”.
Pola súa banda, Samuel Mata lembrou que a totalidade dos fondos recadados —procedentes das inscricións, do merchandising e do café solidario— serán destinados á asociación Duchenne Parent Project España, centrada na investigación destas doenzas.
A xornada está aberta a persoas de todas as idades e contará con cinco modalidades adaptadas a distintos niveis: unha andaina de 2,8 quilómetros, un cross absoluto de 5 quilómetros, probas para categorías sub 16 e sub 14 (2 km), sub 12 e sub 10 (1,2 km) e unha carreira de pitufos de 0,35 quilómetros.
No apartado de participación, as inscricións permanecerán abertas ata o 22 de abril a través da web Carreiras Galegas, onde tamén se habilitou a opción de colaborar mediante o denominado dorsal cero para quen non poida asistir.
Desde a organización subliñouse tamén o carácter divulgativo da iniciativa. Lueiro lembrou que “o máis importante desta iniciativa é o seu obxectivo: dar visibilidade á distrofia muscular de Duchenne e Becker, unha enfermidade rara que a día de hoxe non ten cura”, ao tempo que animou a colaborar “correndo, camiñando ou contribuíndo á recadación”.
No mesmo sentido, Juanma Mata convidou á cidadanía a sumarse á xornada “para desfrutar deste gran día, visibilizar esta enfermidade rara e acompañar”. Tamén Iván Sanmartín trasladou o apoio da Federación Galega de Atletismo e animou tanto á cidadanía como aos clubs deportivos a participar nesta convocatoria.
Desde o Club Atletismo Obradoiro, Amador Pena destacou as características do percorrido, que definiu como “un circuito e a zona como espléndida para correr”, e incidiu en que a proposta está pensada tanto para atletas habituais como para persoas que se achegan por primeira vez a este tipo de actividades.
RESTRICIÓNS DE TRÁFICO E RECOMENDACIÓNS
Con motivo da celebración do evento e doutros actos deportivos coincidentes, a organización informou de que a rúa das Estrelas permanecerá cortada ao tráfico, polo que se recomenda ás persoas participantes facer uso do transporte público ou acceder en vehículo particular pola zona de San Marcos para facilitar a mobilidade e garantir a seguridade.
