O Hotel Monumento San Francisco de Santiago converterase este mércores no escenario dunha xornada centrada na promoción da vida saudable e no impulso do envellecemento activo, coincidindo coa preparación de ‘O Gran Camiño 2026’ e en colaboración coa aseguradora Asisa.
Baixo o título ‘Coidarse hoxe para vivir mellor mañá’, a iniciativa desenvolverase a partir das 19:00 e pretende ofrecer un espazo de reflexión arredor da importancia do exercicio físico e dos hábitos saudables como ferramentas para mellorar a calidade de vida a longo prazo.
O programa inclúe unha mesa de relatorios na que participarán o cardiólogo José Ramón González Juanatey e os profesionais da saúde José María Rodríguez Vicente, Isabel Abad e Xermán Bugallo Sanz. A xornada contará tamén cun enfoque ligado ao ámbito deportivo coa presenza dos exciclistas profesionais Álvaro Piñeiro e Ezequiel Mosquera, que achegarán a súa experiencia vinculada á práctica de alto rendemento.
O acto contará ademais con representación institucional da Xunta de Galicia, coa asistencia do conselleiro de Sanidade, Antonio Gómez Caamaño, e do director xerente da Fundación Deporte Galego, Iván Caravel San Emeterio.
Segundo informou a organización a través dun comunicado, o acceso ao evento é gratuíto, mais o aforamento é limitado, polo que será necesario realizar unha reserva previa enviando unha solicitude ao correo electrónico protocolo@emesports.es.
A convocatoria insírese nas actividades paralelas vinculadas á celebración de ‘O Gran Camiño 2026’, unha cita deportiva que volverá situar a Galicia no calendario ciclista internacional e que, neste caso, servirá tamén como marco para promover mensaxes relacionadas coa saúde e o coidado persoal.
