O Concello de Santiago presentou este martes a reforma integral do pavillón municipal de Santa Isabel e da piscina anexa, nunha visita ás instalacións na que participaron a alcaldesa, Goretti Sanmartín, o concelleiro de Obras, Xesús Domínguez, e a concelleira de Deportes, Pilar Lueiro, xunto co equipo técnico responsable da actuación.
A intervención foi financiada con cargo aos fondos PIREP e supuxo un investimento superior aos 2.600.000 euros, destinados principalmente á mellora da envolvente enerxética, á adaptación da accesibilidade e a traballos de conservación nun edificio considerado de referencia para o deporte municipal.
Segundo explicou o técnico director da obra, a actuación permitiu abordar “intervencións moi necesarias que encaixaron perfectamente no obxectivo desa subvención”, centrada na mellora das envolventes e na adaptación dos espazos. Neste sentido, detallou que se renovaron completamente as cubertas tanto do pavillón como da piscina, incorporando illamentos e materiais adaptados ao entorno. Tamén se substituíron as carpinterías, ventás e óculos, “respectando o deseño orixinal”.
No ámbito da eficiencia enerxética, a piscina experimentou unha renovación integral das súas instalacións. O técnico indicou que se modificou a climatización, instalouse unha nova deshumidificadora e actualizouse a produción de auga quente sanitaria. Ademais, colocouse unha batería de paneis solares fotovoltaicos que multiplica de maneira significativa a capacidade previa de xeración.
NOVO ACCESO E ELIMINACIÓN DE BARREIRAS
Un dos cambios máis visibles é a creación dunha nova entrada desde a praza, que substitúe o antigo acceso situado no extremo oposto do edificio. A fachada, anteriormente opaca, transformouse nun espazo acristalado que permite a conexión visual co exterior e mellora a relación co entorno urbano.
“O que fixemos foi aproveitar esta posibilidade para facer un novo acceso de cara á cidade”, explicou o técnico, quen subliñou que se eliminaron as barreiras arquitectónicas mediante a instalación dun ascensor que comunica os distintos niveis, así como novos aseos e vestiarios adaptados. O espazo interior incorpora tamén unha zona diáfana destinada á reunión e á socialización, con servizos complementarios para eventos deportivos.
A alcaldesa destacou que a actuación supón “un antes e un despois” para estas instalacións municipais e incidiu en que “o máis importante de todas estas obras son, por un lado, todo o que ten que ver con eficiencia enerxética e, aparte diso, con obras de accesibilidade”. Sanmartín sinalou que o obxectivo foi “facer unha integración máis importante do pavillón no conxunto da cidade”, de modo que a praza principal de acceso gañe actividade e vitalidade.
CONSERVACIÓN ESTRUTURAL E RENOVACIÓN DA PISCINA
Xunto ás melloras visibles, a intervención incluíu actuacións de conservación estrutural. No pavillón procedeuse ao lixado e pintado da estrutura metálica que soporta a cuberta, un traballo que, segundo o técnico, “pode pasar un pouco desapercibido, pero ten unha importancia relevante para a estrutura”.
Na piscina acometeuse a reposición completa dos revestimentos, incluíndo a cerámica do vaso, das praias e do perímetro. As obras completan así unha renovación integral do complexo deportivo.
A alcaldesa avanzou que, tras a visita, queda pendente a recepción oficial das obras, prevista para as próximas semanas. Unha vez formalizado este trámite, o Concello prevé a apertura das instalacións ao público.
